Киир

Киир

Бүгүн, алтынньы 18 күнүгэр, Горнай улууһугар ойуур баһаарыттан эмсэҕэлээбит Бэс Күөл сэлиэнньэтигэр «Кэскил» түөлбэтигэр бүтэһик тутуллубут саҥа дьиэлэр күлүүстэрин хаһаайыттарыгар туттардылар. 

«Алдьархайдаах уот тоҕо ааҥнаан киириэҕиттэн, бэс күөллэри кытары бииргэ сырыттым. Олорор дьиэлэрин, хаһаайыстыбаннай тутууларын уокка былдьаппыт ыалларга көмө оҥорор туһунан дьаһалга илии баттаабытым. Оччолорго өрөспүүбүлүкэ бырабыыталыстыбата баһаартан эмсэҕэлээбиттэргэ кылгас кэмҥэ саҥа дьиэлэри тутуоҕа диэн эрэннэрбитим. Ол эрэлим олоххо киирбититтэн астынабын уонна эһиги үөрүүгүтүн тэҥҥэ үллэстэбин», — диэн Ил Дархан Айсен Николаев эттэ.

Саҥа  дьиэлэри тутууга тоҕус хампаанньа үлэлээбит.

«Биһиги олохтоохторго дьиэлэри тутуу таһынан, микрооройуону тупсардыбыт. Билигин сэлиэнньэҕэ суол үлэтэ барыта түмүктэннэ, дьиэлэргэ түргэн тэтимнээх интэриниэт холбонно, саҥа хотоннор тутулуннулар, 100 төбө сүөһү аҕаллыбыт», — диэн Айсен Николаев бэлиэтээтэ.

Бэс Күөлү чөлүгэр түһэрэргэ өрөспүүбүлүкэ барыта кытынна. Сэлиэнньэ олохтоохторугар Саха сириттэн уонна дойду атын эрэгийиэннэриттэн волонтердар кэлэн көмөлөспүттэрэ. Ону тэҥэ өрөспүүбүлүкэтээҕи добровольческай штаб үлэлээбитэ, онно саха дьоно харчынан көмө оҥорбуттара. 

«Барыгытыгар улахан махтал! Дойду бэрэсидьиэнигэр Владимир Владимирович Путиҥҥа, Уһук Илиҥҥэ Арассыыйа Бэрэсидьиэнин боломуочуйалаах бэрэстэбиитэлэ Юрий Петрович Трутневка көмөҕүт иһин махтанабын!», — диэн Айсен Николаевич эттэ. 

Ону таһынан, сэлиэнньэ олохтоохторугар өрөспүүбүлүкэ улахан тэрилтэлэрэ көмөлөспүттэрэ, ол иһигэр «АЛРОСА» 200 мөлүйүөн солкуобайы ыыппыта, Роснефть - 25 мөл. солк..

«Бэс Күөл саҥа олоҕунан тыынна. Саамай сүрүнэ диэн олохтоохтор билигин сүрэхтэрэ уоскуйда, сарсыҥҥы күҥҥэ эрэллээх буоллулар. Бэс Күөл  уонна кини дьонун-сэргэтин кэскилэ сырдык, дьоллоох эрэ буоллун!», — диэн Айсен Николаев түмүктээтэ.

Тарҕат:

Санааҕын суруй