Саха сиригэр биир балыгы хостуур тэрилтэ бэриллибит квотаттан таһынан, сыаналаах Сибиир хатыыһын хостообут. Бу туһунан ИДьМ иһитиннэрэр.
"Полиция үлэһиттэрэ балыгы хостуур тэрилтэ сайыны быһа квотаны таһынан, аһара баран Сибиир хатыыһын хостообутун туһунан иһитиннэриини туппуттар. Өлүөнэҕэ бу балыгы браконьердыы хостообуттарын туһунан чахчы бигэргэммит", - диэн иһитиннэриигэ суруллар.
Оперативниктар тэрилтэ салайааччытын суудунатын сыныйан көрбүттэр. Онно 430 кг хатыыһы уонна 88 кг хара искэҕи булбуттар. Инньэ гынан, урбаанньыт 330 кг таһынан балыктаабыт.
Ихтиологическэй эспэртиисэ Сибиир хатыыһа буоларын бигэргэппит. Бу сыаналаах, сэдэх балык көрүҥэ РФ норуоттар икки ардыларынааҕы дуогабарынан харыстанар. Маны таһынан, суудунаҕа эттэммит тайах этин уонна икки сааны, балыктыыр тэрили булбуттар. Билиҥҥитэ хоромньуну 7 мөл. солк. диэн ааҕаллар. Холуобунай дьыалалары көбүтэн, Саха сиринээҕи силиэстийэлиир управлениеҕа биэрбиттэр.
