Алексей Дьячковскай: “Былаас, уопсастыба уонна биисинэс көмөҕө бииргэ туруннулар”

Горнай улууһун Бэс Күөл нэһилиэгэ саҥа олоҕу саҕалыыр. Манна икки ый иһигэр сөҕүмэр үлэ ыытылынна. Бу бырайыагы олоххо киллэрии үп өттүнэн өйөбүлэ суох хайдах даҕаны кыаллыа суох этэ. Онуоха өрөспүүбүлүкэ бөдөҥ тэрилтэлэрэ, бастатан туран, АЛРОСА хампаанньа дэриэбинэни чөлүгэр түһэриигэ көмөҕө туруммуттара.

Атырдьах ыйын 7 күнүгэр Горнайга уот туран, Бэс Күөлү күл-көмөр оҥорбута. Чыпчылыйыах иһигэр дьон дьиэтэ-уота, мала-сала, аһа-үөлэ суох турар бэйэлэрэ хаалбыттара. Иэдээҥҥэ түбэспиттэргэ өрөспүүбүлүкэ дьоно бүттүүн турунан, аһынан, уунан, таҥаһынан-сабынан уо.д.а. көмөлөспүттэрэ. Бастакы күннэргэ Ил Дархан Айсен Николаев тымныы түһүөр диэри бөһүөлэги чөлүгэр түһэрэргэ тылын биэрбитэ. Быһа түһэн эттэххэ, ити тыл тыалга көппөккө, олоххо киирдэ.

Бэрт кылгас кэм иһигэр өрөспүүбүлүкэ бүддьүө­түттэн бары үлэлэргэ 300 мөл.солк. көрүллүбүтэ. Ол да үрдүнэн, үлэ кыра болдьоххо оҥоһулларынан, эбии үп ирдэнэрэ. Өрөспүүбүлүкэ хас биирдии муннугуттан көмөҕө илиилэрин ууммут дьоҥҥо АЛРОСА эмиэ кыттыһан, 200 мөл.солк. саҥа тутууга анаабыта.

“Айсен Сергеевич АЛРОСА-ны кытта кэпсэтии түмүгэр Бэс Күөлү чөлүгэр түһэриигэ 20 мөл.солк. үп көрүллэрин туһунан сурах улахан үлэҕэ ылсыыга олук буолбута. Бэдэрээтчиттэр туһааннаах үбүлээһин баар буоларыттан эрдийбиттэрэ. Маннык түгэҥҥэ аҥаардас үтүө эрэ санаа татыма биллэр”, – диир Горнай улууһун баһылыга Никита Андреев.

Түргэн быһаарыныы түмүгэр АЛРОСА-ттан киирбит үп Үүнэр көлүөнэ тус сыаллаах пуондатын нөҥүө бэрт кылгас кэм иһигэр тутуу хампаанньаларыгар тиксэриллибитэ. Бэдэрээтчиттэргэ Тутуу министиэристибэтэ хас да сыллар усталарыгар үчүгэй түмүгү көрдөрбүт хампаанньалары киллэрбитэ. Атырдьах ыйын 20 күнүгэр бастакы сыбаайа түспүтэ. Оттон балаҕан ыйын 28 күнүгэр, ол эбэтэр 6 нэдиэлэни кыайбат кэм иһигэр, экологичнай уонна түргэнник тутуллар МХМ-паныалынан тутуллубут бастакы дьиэ үлэҕэ киирбитэ.

Кэскил

Бу сайын Саха сиригэр турбут баһаар айылҕаҕа эрэ буолбакка, олохтоохтор доруобуйаларыгар улахан хоромньуну оҥордо. Ордук улахан охсууну ылбыт Бэс Күөл олохтоохторугар АЛРОСА көмөҕө кэлбитэ.

“Бэс Күөл тула тахсыбыт быһыыга-майгыга былаас, өрөспүүбүлүкэ салалтата, уопсастыбаннас, олохтоохтор уонна биисинэс биир сомоҕо буолан үлэлээтилэр. Ил Дархан Айсен Николаев АЛРОСА салалтатыгар быһа сибээскэ тахсыбытыгар биһиги тута хардарбыппыт. Хампаанньа дириэктэрэ Сергей Сергеевич тус бэйэтэ, салалта тута биир санааҕа кэлэн, иэдээҥҥэ түбэспит Бэс Күөл олохтоохторугар көмөлөһөр сыалтан 20 мөл.солк. аныырга быһаарыммыппыт. Олус кылгас болдьоххо түргэн быһаарыныы, хамсаныы наада этэ. Ону тута өйдөөбүппүт.

Тутуллубут дьиэлэр бука бары толору хааччыллыылаахтар. Бу – олох аныгылыы көрүҥэ, атын олох саҕаланыыта. Ол барыта тыа сирин олоҕун сайдыытыгар олус суолталаах. Биһиги өрөспүүбүлүкэ олохтоохторугар анаммыт бырайыакка сүрүн спонсор быһыытынан кыттыыны ылбыппытыттан олус үөрэбит. Былаас, уопсастыба уонна биисинэс биир сомоҕо буолуулара олох атын да хайысхатыгар салҕаныа диэн эрэллээхпит. Саҥа тутуллубут микроройуон “Кэскил” диэн ааттаммыта мээнэҕэ буолбатах. Бу – сайдыыга суолталаах бэлиэ”, – диэн АЛРОСА генеральнай дириэктэрин бастакы солбуйааччы Алексей Дьячковскай санаатын үллэстэр.

Күн бүгүн Бэм Күөлгэ тутуу түмүктэннэ. 34 дьиэҕэ түннүк уота сандаарда, 175 киһи дьиэнэн хааччыллыбыттарыгар эбии толору хааччыллыы сынньалаҥын биллилэр, саҥа оҕо былаһааккаланнылар, хотонноннулар, тыа хаһаайыстыбатыгар туттуллар тиэхиньикэлэннилэр. Түргэн интэриниэт киирдэ, дьон уоскуйда, инникигэ эрэл санааланна. Кылгас болдьох иһигэр бөһүөлэк чөлүгэр түстэ, саҥа олох төлкөтө түстэннэ.

“Киэҥ эйгэ түннүгэ”

Бэс Күөлгэ GPON технологиянан үрдүк күүрүүлээх интэриниэт тардыллан, 34 дьиэ холбонно. Онно эбии WI-FI-роутердар турдулар. СӨ инновацияҕа, цифровой сайдыыга уонна инфокоммуникационнай технологияҕа миниистирэ Анатолий Семенов этэринэн, Бэс Күөлгэ туруоруллубут мадьыал 2022 сылтан саҕалаан өрөспүүбүлүкэ бары нэһилиэнньэлээх пууннарыгар киириэҕэ. Ити мадьыал иһигэр тэлэбиидэнньэ, араадьыйа, FM-иһитиннэрии, интэриниэт киирэллэр. Бу босхо тэрили туруорууга уонна инники ороскуотун уйунууга судаарыстыба анал бырагырааманы бэлэмниир. Билиҥҥи кэмҥэ Бэс Күөл олохтоохторуттан сайаапканы ылыы бара турар. Онон баҕалаахтар сотору кэминэн интэриниэт бу мадьыалыгар холбонор кыахтаахтар. Мэдиссиинэ булгуччулаах страховкатынан «Устранение цифрового неравенства 2.0» диэн бырагырааманан федеральнай үбүлээһининэн интэриниэккэ олохтоох уһуйаан, оскуола уонна дьаһалта холбоннулар.

Бары бииргэ!

СӨ Үүнэр көлүөнэтин тус сыаллаах пуондата Бэс Күөл олохтоохторугар толору хааччыллыылаах дьиэлэри тутууга үбүлээһин сүрүн үлэтин толордо. Бу сыалга бырамыысыланнаһы сүрүннүүр АЛРОСА, “Таас-Юрях Нефтегаздобыча” диэн “Роснефть” НХ дочерняй хампаанньатын курдук бөдөҥ тэрилтэлэр үптэрин ыыппыттара.

“Бэс Күөлү кылгас болдьох иһигэр чөлүгэр түһэриигэ кыттыыны ылбыт, көмөлөспүт бука бары дьоҥҥо улахан махталбын биллэрэбин. Чахчы, сүҥкэн үлэ ыытылынна”, – диир СӨ Үүнэр көлүөнэтин тус сыаллаах пуондатын генеральнай дириэктэрэ Владимир Егоров.

Саҥа дьиэ күлүүһүн туппут ыаллар бу ыарахан түгэҥҥэ көмө буолбут хас биирдии киһиэхэ махталларын тиэрдэллэр. Этэргэ дылы, “Куһаҕан – үчүгэйдээх”. Иэдээн кэнниттэн бар дьон көмөтүнэн охсуллубут оҥкул саҥа ситиһиилэргэ, сайдыылаах олоххо сирдиэҕэ.

Бэс Күөлү чөлүгэр түһэриигэ Арассыыйа бэрэсидьиэнэ Владимир Путин, Арассыыйа Уһук Илиҥҥэ бэрэстэбиитэлэ Юрий Трутнев улахан болҕомтону уурбуттарын бэлиэтиир тоҕоостоох.