Киир

Киир

 Ааспыт нэдиэлэҕэ Саха сиригэр саҥа хоруона вируһунан ыалдьааччы аҕыйаата. Биллэриллибит өрөбүл күннэр, хааччахтааһыны булгуччу тутуһуу, атыы-эргиэн кииннэригэр уонна өҥөнү оҥорор тэрилтэлэргэ QR-кодтаах киирии бу үчүгэй уларыйыы үөдүйэригэр төрүөт буоллулар. Бу туһунан сэтинньи 5 күнүгэр Саха сирин Ил Дархана Айсен Николаев салайааччылаах Өрөспүүбүлүкэтээҕи суһал ыстаап киинин мунньаҕар иһитиннэрдилэр.

Саха Өрөспүүбүлүкэтин Роспотребнадзорун Бырабылыанньатын көрдөрүүтүнэн, кэнники икки нэдиэлэ иһигэр ыарыы элбээһинэ кыратык 2%-н үрдүк этэ, өссө бу иннинээҕи икки нэдиэлэ көрдөрүүтүнэн үрдээһин 10% этэ. Онон, билиҥҥи хамсык туруга бигэтик ыарахан диэн сыаналанар.

Ыарахан туруктаах ыарыһахтар ахсааннара көҕүрээтэ, билигин кинилэр ахсааннара 155. Ол эрэн, син-биир тыҥа искусственнай вентиляциятын аппаратыгар холбонон сытар ыараханнык ыалдьааччы балачча элбэх, бүгүн оннук туруктаах ыарыһах киһи ахсаана 43.

Эрэгийиэммит тойоно этэринэн, үөскээбит быһыыны-майгыны уҕарытар туһуттан быһыыны ылыы тэтимин түргэтэтии ирдэнэр.

«Кэнники икки нэдиэлэ устатын тухары быһыыны биэрэр хампаанньа өрөспүүбүлүкэҕэ биллэ үчүгэй динамиканы көрдөрөн эрэр, бу көрдөрүүнү хайдах даҕаны гынан төттөрү түһэримиэххэ наада. Билиҥҥи кэмҥэ быһыыны ылыы тэтимэ улахан дьоҥҥо бастакы компонены ылыыга 57-58% таһымыгар сылдьар. Бу көрдөрүүбүтүн 80% диэри тиэрдиэхтээхпит», - диэн Айсен Николаев бэлиэтиир.

 Быһыыны ылыы тэтимэ Муома, Аллайыаха, Аллара Халыма оройуоннарыгар түргэн. Холобура, Муома оройуонугар улахан дьоҥҥо быһыыны биэрии былааҥката 80% куоһарбыт. Ааспыт нэдиэлэлэргэ Дьокуускай куоракка быһыыны ылааччы ахсаана элбээбит.

Ол эрэн Кэбээйи, Нам, Нерюнгри уонна Чурапчы оройуоннарыгар быһыыны ылыы тэтимэ 50%-н кыра эбит.

Саха сирин сүрүн санитарнай бырааһа Маргарита Игнатьева этэринэн, 41-с нэдиэлэ түмүгүнэн эрэгийиэҥҥэ 5,5 тыһ. киһи хоруона вируһун утары быһыыны ылбыт эбит буоллаҕына, 42-с нэдиэлэҕэ көрдөрүү икки төгүл үрдээбит - 11 308 киһи быһыыны ылбыт.

Оттон ааспыт нэдиэлэ түмүгүнэн быһыыны биэрэр хампаанньа тэтимэ үс төгүл үрдээбит уонна 18 тыһ. тахса киһи буолбут. Биллэн туран, маныаха өрөбүл күннэрэ уонна QR-коду киллэрии төһүү күүс буолбуттар. Эригийиэҥҥэ хамсык туруга арыый уҕарыйан эрэрэ коечнай пуонда аһаҕас буолуутугар тиэрдибит. Бу доруобуйа харыстабылын систиэмэтигэр ноҕоруускунаны аччатыа диэн эрэл санааны үөскэтэр.

Мунньах түмүгүнэн, хоруона вируһунан ыалдьыы тэтимэ намтаабытын даҕаны иһин, хамсык туруга толору бигэтийдэ диэн этэр эрдэ диэн Айсен Николаев бэлиэтээтэ. Суһал киин ыстааптара хоруона вируһуттан быһыыны биэрии хампаанньатын уонна туох баар хааччаҕы тутуһан сылдьыы хонтуруолун аччатыа суохтаахтар.

Тарҕат:

Санааҕын суруй