“Балаһыанньа ыарахан. Биһиги сүрүн сорукпут – тахсыбыт балаһыанньаны туоратыы буолар. Маннык улахан халаан уута кэлиэ диэн сылыктаабатахтара. Эмсэҕэлээбит дьоҥҥо туох кыалларынан көмө оҥоһуллуоҕа”, - диэтэ Егор Борисов.
Олохтоохтор халаантан тахсыбыт хоромньуну хайдах толуйуохтарын туһунан ыйыталастылар. Көрсүһүү кэмигэр биллибитинэн, сорох эмсэҕэлээччилэр бэрэпиискэлэрэ суох эбит. Ефремово учаастагар баар дьиэлэр Регпалатаҕа бэлиэтэммэтэх да эбиттэр. Маны таһынан, олохтоохтор Аммаҕа уонна Чапчылҕаҥҥа хочуолунай оттуллубатын этиннилэр.
“Бородууктанан, эминэн-томунан хааччыйыыны, уоту, ититиини, суолу оҥорууну барытын быһаарыахпыт. Нэһилиэк баһылыктара маннык балаһыанньаҕа түргэнник, конструктивнайдык ылсан үлэлиэхтээххит”, - диэтэ Борисов. Көрсүһүүгэ Амма, Өнньүөс, Чапчылҕан уонна Абаҕа олохтоохторо бааллар.
Аммаҕа тиийээт, Егор Борисов суһал мунньаҕы ыытта. Онно бастатан туран, эминэн, аһынан, иһэр уунан хааччыйыыны, суотабай сибээһи уонна уоту быстала суох биэрэллэрин курдук дьаһалларга болҕомто ууруллуохтааҕын эттэ. Маны таһынан, нэһилиэнньэҕэ суһаллык иһитиннэриини былаас, полиция, норуодунай дружинниктар көмөлөрүнэн ыытарга болҕойоллорун эттэ. Маны таһынан, олохтоох урбаанньыттар сыананы үрдэппэттэрин курдук дьаһайалларыгар эттэ.
“Биһиги кыһалҕалаах дьону сир-халлаан икки ардыгар хаалларарбыт табыллыбат. Хайаан да суһал көмө оҥоһуллуоҕа”, - диэтэ Егор Борисов.
