Судаарыстыбыннай Дуума икки уонна онтон элбэх оҕолоох ыаллары саҥа дьиэ атыылаһалларыгар, эбэтэр дьиэлэрин атыылыыр түгэннэригэр киирэр дохуоттарын, НДФЛ ыспараапкатыттан босхолуурга сокуон ылынна.
Судаарыстыбыннай Дуума бэрэссэдээтэлэ Владимир Володин бэлиэтииринэн: «Бу сокуон быйыл тохсунньу 1 күнүттэн атыыламмыт кыбартыыраларга кытта тэнийиэ». Инньэ гынан, сокуон биир сыл эрдэ эргиллэр күүстээх буолар.
НДФЛ сууммата үгүс дьиэ кэргэн дохуотугар күүскэ охсорун учуоттаан туран, РФ бэрэсидьиэнэ нолуокка кэккэ чэпчэтиилэри көрөргө соруйда. Саҥа сокуон Арассыыйа элбэх оҕолоох дьиэ кэргэттэригэр саҥа дьиэ-уот атыылаһалларыгар – сүрүн күүс-көмө, төһүү буолуоҕа диэн Судаарыстыбыннай Дуумаҕа эрэнэллэр.
Докумуон нолуок төлөбүрүттэн икки уонна онтон элбэх оҕолоох дьону босхолуур, кинилэр дьиэ атыылаатахтарына, ордор суумманы дьон саҥа дьиэ атыылаһалларыгар туһаныахтарын сөп. Чэпчэтии төрөппүттэргэ эрэ буолбакка, эпэкииннэргэ (оҕону иитэ ылбыт дьоҥҥо) кытары тарҕанар. Өскөтүн кинилэр оҕолоро сокуоннай саастарын ситэ илик буоллахтарына, эбэтэр кинилэргэ 24 саастарыгар диэри күнүскү үөрэххэ үөрэнэр ыччаттардаах буоллахтарына.
Саҥа дьиэ, эргэ дьиэ атыыламмыт дьылыгар атыылаһыллыахтаах. Эбэтэр кэлэр сыл муус устар 30 күнүттэн хойута суох. Кадастровай сыаната 50 мөл. тахсыа суохтаах. Дьиэ-уот атыыланар кэмигэр, дьиэ кэргэн биир да чилиэнигэр атын бас билэр дьиэтэ суох буолуохтаах. Атыылаһар дьиэлэрин сыанатын 50 % куоһарар.
