Киир

Киир

Саха Өрөспүүбүлүкэтин Үүнэр көлүөнэ пуондата “Медиа-ускуустуба уонна медиа-индустрия эйгэтигэр хаартыскаҕа түһэрээччилэр, биидьийэ уһулар эпэрээтэрдэр уонна исписэлиистэр сообществолара” ЯРООну кытта «Proskills Yakutia» диэн, наадалаах билиигэ сирдиир үөрэх оскуолатын аһан үлэлэтиэхтэрэ. Бу оскуола Ил Дархан Айсен Николаев анал сорудаҕынан олоххо киирэр киэҥ кэскиллээх (стратегическай) эбийиэгэ – Үүнэр көлүөнэ пааркатын – үөрэххэ бырагырааматын чэрчитинэн олоххо киирэр.

Бу эбийиэги тутууну уонна тутуу ис хааччыллыытын, эрдэ биллэрбиппит курдук, СӨ Үүнэр көлүөнэ тус сыаллаах пуондата иилээн-саҕалаан, сүрүннээн ыытар. 2021-2023 сылларга үлэлиир “Кэлэр кэскил туһугар” бырагыраама иһинэн. Маны барытын АЛРОСА хампаанньа үбүлүүр.
 
«Куорат олохтоохторун сынньалаҥа уонна дьарыга туһалаах уонна көхтөөх буоларын туһугар сылы эргиччи үлэлиэхтээх туонаҕа оҕо аймаҕы уонна ыччаты креативнай үөрүйэххэ сирдиир, үөрэтэр киин тутуллуоҕа. Билигин эбийиэк дьэндэйиэхтээх сирин бэлэмниири саҕалаатылар. Оттон биһиги ол кэмҥэ киин ис хоһоонун оҥорууну, ол эбэтэр оскуола үөрэнээччилэрин креативнай экэниэмикэҕэ, урбааҥҥа үөрүйэхтиир куурустары, бырагыраамалары олоххо киллэриини саҕалаатыбыт. Ол курдук, күн бүгүн биһиэхэ Дьокуускай куорат оскуолаларын 6-10-с кылаастарын үөрэнээччилэригэр анаан, “Proдвижение бренда” диэн кууруһу саҕалаатыбыт. Бу манна оскуола үөрэнээччилэрэ медиа эйгэтигэр, профессиональнай сайдыыга уонна инники идэлэрин талалларыгар (профориентация) көмөлөөх идэтийии үөрүйэхтэригэр үөрэниэхтэрэ”, – диэн, СӨ Үүнэр көлүөнэ пуондатын Тус сыаллаах бырагыраамаларга управлениетын начаалынньыга Сардана Попова иһитиннэрдэ. Үөрэтии Саха брендин кейстэригэр барар. Оҕолору өрөспүүбүлүкэ медиа уонна маркетиҥҥа эйгэтин бастыҥ идэтийбит үлэһиттэрэ, уһуйааччылара үөрэтиэхтэрэ-такайыахтара. Үөрэтии икки көрүҥүнэн – онлайн уонна офлайн – барыаҕа. Кууруска хаартыскаҕа түһэрии төрүтүгэр, биидьийэни таҥарга, мантаастыырга, тыл этэр ускуустубаҕа, маркетинг стратегиятын, медиа-былааны оҥосторго, ону тэҥэ анимация каадырдарын оҥоруу курдук араас интэриэһинэй, туһалаах хайысхаларга үөрэтиэхтэрэ. Түөрүйэни эрэ буолбакка, быраактыка өттүнэн ылсан дьарыктыахтара.
1195c28b ac40 428a b355 7b1f5ce3c491
 
 
«Бырагыраамалары оҥорорбутугар быраактыка өттүгэр ураты болҕомтону уурдубут. Оҕолору бэйэ илиитинэн тутан-хабан, айан-тутан таһаарар сатабылга үөрэтиэхпит. Мин саныахпар, аныгы кэм үөрэнээччилэрин чуо итинниккэ үөрэтиэх кэриҥнээхпит. Оскуолаларга хаартыска, биидьийэ куруһуога суоҕун тэҥэ, оттон ол аныгы үйэҕэ олус наадалаах хайысха”, – диэн санаалаах «Пространство» Айар-тутар платформа төрүттээччитэ Алексей Павлов.
 
«Ону тэҥэ оҕону дьону кытта сатаан алтыһарга, элбэх дьон иннигэр туран бэйэ санаатын сатаан тиэрдэ үөрэнэргэ көмөлөһүөхтээхпит. Киһи бэйэтин санаатын тылынан толору тиэрдэр, аудиторияны кытта кыбыстыбакка, аһаҕастык сатаан кэпсэтэр түгэнигэр – өрүү да ситиһиилэнэр, наадалаах исписэлиис буолар”, – диэн, «Proдвижение бренда” куурус преподавателэ, эспиэр Анна Фомина-Миронова санаатын үллэстэр.
 
 

72f02745 cc97 4441 a9a7 47ac1f48991f

 
 
«Proskills Yakutia» үөрэтэр оскуоланы бүтэрбиттэр Дьокуускай куоракка баар “ Үлэ кыбартаала” креативнай кластер резиденэ буолар кыахтара улахан.
Санатан эттэххэ, Дьокуускай куорат 79-с кыбартаалыгар тутуллуохтаах Үүнэр көлүөнэ пааркатын тутууга бэлэмнэнии үлэ бу сэтинньиттэн саҕаламмыта. Бу паарканы тутуу хас сыл аайы хастыы да социальнай суолталаах эбийиэктэри үбүлээн туттарар АЛРОСА хампаанньа үбүн суотугар, бүддьүөтү таһынан источниктан үбүлэнэр. Эбийиэк уопсай суумата 1,5 млрд солк. Тутууну 2021-2025 сылларга тутан, үлэҕэ киллэриэхтээхтэр.
 
Ыспыраапка:
СӨ Үүнэр көлүөнэ тус сыаллаах пуондатын кытта бииргэ үлэлэһии – АЛРОСА аһымал хайысхатыгар ыытар үлэтин-биир муҥутуур киэҥ хабааннаах үлэтиттэн биирдэстэрэ.
Ол курдук, АЛРОСА 2011 сылтан саҕалаан, тустаах Пуонда социальнай соруктары толороругар анаан, эттэххэ эрэ дөбөҥ, бүтүн 7,176 миллиард солк. биэрбитэ. Аҥаардас ааспыт 2012-2020 сылларга олохтоох алмаас хампаанньатын үбүгэр-харчытыгар 39 саҥа эбийиэк үлэҕэ киирэн, дьоҥҥо-сэргэҕэ туһата-көдьүүһэ сүҥкэн. Ол иһигэр, 8 үөрэҕирии салаатын тутуута, успуорт 10 эбийиэгэ, 10 култуура уонна духуобунас сайдыытын тутуута, 4 балыыһа, дьон, оҕо доруобуйатын туругун көннөрүнэр, чөлүгэр түһэрэр 4 киин уонна 3 олорор дьиэ бааллар.
Тарҕат:

Санааҕын суруй