Киир

Киир

Мииринэй оройуона хоруона хамсыгынан ыалдьыыга Дьокуускай куорат кэнниттэн иккис миэстэҕэ иһэр. Өрөспүүбүлүкэтээҕи хоруона дьаҥын утары охсуһар Оперативнай штаб чахчыларынан сирдэттэххэ, сэтинньи 21 күнүттэн ылата, Мииринэйгэ 96 киһи ыарыйда.

Ол иннинэ, оройуоннааҕы балыыһа дьаныардаах үлэтин түмүгэр, КОВИД-19-нан ыалдьыы арыый да намыраан испитэ.

Дьон дьалбаа сыһыанын уонна антиваксердар «омсолоох үлэлэрин» түмүгэр, хоруона хамсыга Мииринэйгэ эмиэ сытыырхайан турда.

Бастатан туран, ыччат мааската суох сылдьар, дьиэлэр подъезтарыгар элбэх буолан ордууланаллар, бөлөҕүнэн сылдьаллар. Тымныыны аахсыбакка таһырдьа оҕо-аймах толору. Социальнай арыт(1,5 м) тутуһуллубат.

Гамбургер, пицца, шаурма, шашлык атыылыыр сирдэргэ - ыччат ордук элбэхтик мустар.

Мииринэйгэ, дьон тоҕуоруһар сирдэригэр – улахан эргиэн Кииннэригэр, соторутааҕыттан ыла эрэ, QR-куоду ирдиир дьону көрөбүн. Оччугуй маҕаһыыннарга, кыбартыыра тииптээх көстүүнэйдэргэ, таксыыларга «куйаар куодун”төрүт ыйыппаттар. Кыһамматтар.

Соҕуруу дойдулартан араас дьон ааллаан кэлэ тураллар. Олору хонтуруоллуур уустук.

Онон, бу уодаһыннаах ыарыыны Мииринэйгэ дьаалайбаттарын түмүгэр, дьон бэйэ-бэйэлэрин хоруона хамсыгынан сутуһа тураллар.

Хоруона хамсыга туруоҕуттан ылата, Мииринэй оройуонун устун ниэпкэ-гааска үлэлиир баахта дьонун сыныйан бэрэбиэркэлииллэр. Кинилэр, эмиэ, Мииринэй олохтоохторун курдук хамсыгы утары вакцина ылаллар.

Уон хонуктааҕыттан бэттэх, Мииринэй поликлиникатыгар хоруона хамсыгын быһаарар ПЦР-анаалыстары ылыы кыраапыга уларыйда. Ол аата, бэнидиэнньиктэн бээтинсэҕэ, үс чаастан биэскэ диэри 118 В хоско анаалыс ылаллар.

Оттон прививка биэрэр, 401, 403-с хостор, вакцина ылыан баҕалаахтары куруук күүтэллэр.

Бу туһунан, МЦРБ саайтыгар биллэрэн тураллар.

Дистанционнай ньыма эмиэ баар. Ол эбэтэр, ыарыһахтары он-лайн быһыытынан, түлүппүөнүнэн поликлиника сибээстэһэ олорор.

Хомойуох иһин Госуслуги Мииринэйгэ мөлтөхтүк үлэлиир. Мунаараачы элбэх.

Мииринэй ковиднай госпитала, нефтяниктары уонна газовиктары сэргэ, чугастыы сытар Бүлүү бөлөх улуустарыттан ыарахан туруктаах ыарыһахтарын эмтээн кэллэ.

Аны билигин, Анаабыр уонна Өлөөн улуустарыттан санавиация хоруона хамсыгынан ыалдьыбыттары аҕала турар. Ол диэки тыҥа туругун тургутар көмпүүтэр томографтара суохтар дииллэр.

Дьокуускай, бу хотугу улуустартан ыарыһахтары ылбата биллэр, бэйэтин ыарыһахтара толорулар.

Оттон Мииринэй балыыһатыгар кислород ыстаансыйата да икки КТ да бааллар. Ковид госпиталыгар ИВЛ аппарааттара туһаныллаллар.

Бу ый саҥатыгар, ковид госпиталыгар ыарыһах лаппа элбээн, ыарахан туруктаахтар кииритэлээн, реанимация 24 куойкаҕа тиийэ улаатыннарылынна.

Хотугу улуустартан кэлэр ыарыһахтар тустарынан чуолкайдаатахха, Мииринэй ковиднай госпиталыгар тыҥатын отут бырыһыанын сиэппит 84 саастаах Өлөөн эмээхсинин көрөллөр-истэллэр.

Хоруона хамсыгын утары кытаанах охсуһуу салҕанан барар.

Станислав Алексеев. Мииринэй куората.

Тарҕат:

Санааҕын суруй