РФ КоАп 20.6.1 ыстатыйатын 1 чааһынан, «Лена» киинэ тыйаатырыгар көбүтүллүбүт административнай быраабы кэһии туһунан дьыаланы Дьокуускай куораттааҕы суут көрдө.
Алтынньы 24 күнүгэр Дьокуускайдааҕы суһал ыстаап хамсык кэмигэр хааччах төһө тутуһулларын бэрэбиэркэлиир уочараттаах эриэйдэ оҥорбут. Кэһиилэри “Лена” уонна “Киин” киинэ тыйаатырдарыгар булбуттар. Бу киинэ уораҕайдарыгар көрөөччүлэр тэмпэрэтиирэлэрин кээмэйдээбэттэр эбит уонна саалаҕа дьону QR куодтарын бэрэбиэркэлээбэккэ эрэ киллэрэллэрэ биллэн тахсыбыт. Кэһээччилэр тустарыгар административнай быраабы кэһии туһунан аахталар оҥоһуллубуттар.
Суут кэмигэр “Лена” киинэ тыйаатырын бэрэстэбиитэлэ кэһиилэр көннөрүлүннүлэр диэн иһитиннэрдэ. Хааччах киирбит бастакы эрэ күнүгэр QR куоду бэрэбиэркэлээччилэр турбатахтар. Билиҥҥи кэм туругунан, киинэ тыйаатыра финансовай балаһыанньата быстар мөлтөҕүнэн ситимнээн, бэрэстэбиитэл сууттан сэрэтии эрэ биэрэллэригэр көрдөстө.
Ол эрээри, суут сэрэтии биэрэргэ төрүөт булбата. Тоҕо диэтэххэ, киинэ тыйаатырын дьаһалтата көрөөччүлэр чэгиэннэрин туоһулуур тустаах докумуону ирдээбэккэ, көрөөччүлэр доруобуйаларыгар куттал үөскэппит, . РФ КоАП 3.4. ыстатыйатын, 2 чааһынан маннык кэһиини оҥордоххо, туох да алы гыныы, сэрэтии көрүллүбэт.
Тиһэҕэр, “Лена” киинэ тыйаатыра 50 тыһ сууммаҕа ыстарааптанна. Ыстараап, бастанабылыанньыйа сокуоннай күүһүгэр киирбит күнүттэн ылата, 60 күн иһигэр төлөнүөхтээх. .
«Киин» киинэ тыйаатырын туһугар административнай быраабы кэһии туһунан дьыала өссө көрүллэ илик.
