Үгэскэ кубулуйбут “Сылааскыттан үллэһин” (“Поделись теплом”) аахсыйаҕа, аһыныгас сүрэхтээх Семен Флегонтов аатынан Хадаар орто оскуолатын 1-11 кылааһын үөрэнээччилэрэ улууспут аҕам саастаах уонна доруобуйаларынан хааччахтаах дьонугар анаан 80-ча ип-ичигэс, бөҕө-таҕа үтүлүктэри тигэн ыыттылар.
“Хадаар орто оскуолата биһиги шефтээх тэрилтэбит буолар. Оскуола дириэктэрин иитэр-үөрэтэр үлэҕэ солбуйааччы Лидия Ивановна Лукина көҕүлээһинэн, хорсун санаалаах Хадаарбыт ыччаттара бу хаһыс да сырыыларын биһиги улууспут кырдьаҕастарыгар, доруобуйаларынан хааччахтаах дьоммутугар анаан олус үчүгэй үтүлүктэри тигэн ыыталлар. Түгэнинэн туһанан оскуолабыт үөрэнээччилэригэр, кинилэр төрөппүттэригэр уонна биллэн туран оскуола уопсай кэлэктиибигэр улахан махталбытын тиэрдэбит. Уһун олох суолугар аһыныгас, хорсун сүрэхтээх Хадаар ыччата элбии,үксүү, чэчирии турдуннар”, - диэн Чурапчы улууһун социальнай харалта управлениетын начаалынньыга Лидия Васильевна Тосукаева санаатын үллэстэр.
Ылыллыбыт сигэтэ: https://xn--80aa7aggbp2b.xn--p1ai/article/33600
