Ахсынньы 13 күнүгэр улуус баһылыга Сергей Винокуров Сэбиэскэй сойуус саҕана Варшаватааҕы Дуогабарга олоҕуран Европа социалистическай дойдуларыгар, ол иһигэр Германияҕа байыаннай сулууспаны ааспыт оччотооҕу эдэр саллааттары кытта көрүстэ.
Ол курдук Бүлүү улууһуттан араас сылларга Германияҕа ытык иэстэрин чиэстээхтик толорон сулууспалаабыт күн бүгүн 12 киһи баар. Кинилэртэн билигин Бүлүү куоратыгар олорор, үлэлиир 4 киһи көрсүһүүгэ кэлэн, оччотооҕуга ханнык чааска, куоракка хайдах сулууспалаабыттарын, туох идэни ылбыттарын, сибээскэ, арлиллерияҕа, байыаннай стратегическай пууннары тас өстөөхтөн көмүскээһиҥҥэ, эриирдээх-мускуурдаах байыаннай үөрэх оскуолатын туйгуннук ааспыттарын кэпсээтилэр. Ол кэмҥэ Германияҕа сулууспалыырга чэгиэн доруобуйалаах, сөптөөх үөрэхтээх, өй-санаа өттүнэн күүстээх эдэр ыччатары сүүмэрдээн ыыталлар эбит.
Бу көрсүһүү кыттыылаахтара Андрей Алексеевич Каратаев, Эдуард Васильевич Каратаев, Руслан Романович Петров, Николай Матвеевич Иннокентьев Германияҕа этэҥҥэ сулууспалаан дойдуларыгар ытык иэстэрин чиэстээхтик толорон кэлбиттэрэ. Бэйэтин кэмигэр Забайкальскай байыаннай уокурук танковай сэриилэригэр взвод хамандыырынан сулууспалаабыт Сергей Николаевич Винокуров модун кыахтаах Сэбиэскэй Армия кэккэтигэр сулууспалааһын үрдүк чиэс, Ийэ дойдуга бэриниилээх буолуу, дьиҥнээх патриотическай тыыҥҥа, өйгө-санааҕа иитии оскуолата буоларын ордук чорботон бэлиэтээтэ. Салгыы хардарыта санааларын атастаһан армия олоҕун, хайдах сулууспалаабыттарын, бойобуой үөрэх, хас да хонуктаах марш-бросоктар, көрүдьүөстээх түгэннэр тустарынан ирэ-хоро сэһэргэстилэр.
Түмүккэ улуус баһылыга Сергей Николаевич Винокуров кинилэргэ хас биирдиилэригэр “75 лет Группе советских войск в Германии” диэн үбүлүөйүнэй общественнай мэтээллэри туттарда уонна салгыы кинилэргэ үлэлэригэр, тус олохторугар ситиһиилэри, чэгиэн доруобуйаны баҕарда.
Ити курдук Бүлүү уолаттара ыраах Германияҕа байыаннай сулууспаны этэҥҥэ ааһан, дойдуларыгар төннөн кэлэн олохторун оҥостон, төрөөбүт улуустарыгар этэҥҥэ үлэлээн-хамсаан олороллоруттан биһиги үөрэбит, кинилэринэн киэн туттабыт.
Николай Федоров
Сигэтэ: https://xn--80avakbauqq.xn--p1ai/article/34361
