мииМииринэй куоратыгар дьиэ сыаната сүрдээҕинтүстэ. Бэл, икки хостоох таас дьиэ Дьокуускай биир хостооҕунааҕар балтараа бүк чэпчээтэ. Атыылаһааччы аҕыйах.
Барыларынааҕар элбэхтик атыыга туруоруллар, икки хостоох КПД (“сибиэчикэ”), эбэтэр бөдөҥ панеллаах таас дьиэ сыанатын ылан көрүөҕүҥ. Атыылааччы сыаната, дьиэ куорат ханнык оройуонугар баарыттан быһаччы тутулуктаах. Сүрүн ирдэбил – дьиэ өрөмүөннээх, итии-тымныы уу усчуотчуктаах, домофоннаах буолуохтаах. Маннык кыбартыыра, холобур, 49-53 кв. м. иэннээх – ортотунан 3 мөлүйүөн солк. сыаналаах. Иллэрээ сыл, маннык кыбартыыраны 3,8, 4 мөлүйүөҥҥэ атыылыыллара.
Өрөмүөнэ суох икки хостоох КПД куорат кытыытыгар 2 мөл. 500 тыһыынчаҕа диэри түспүт чахчыта баар. Оттон куорат киинигэр, маннык «сибиэчикэ», өрөмүөнэ да суоҕун иһин, 3 мөлүйүөн диэн баран хаһаайыттар батынан кэбиһэллэр эбит.
Аны туран, урукку сыананы таарыйан ылыахха. 2007 сыллаахха, Мииринэйгэ, биир хостоох 464-сиэрийэлээх «КПДны» 1 мөл. 500 солк, 1 мөл.700 солк, икки хостоох дьиэни – 2 мөл. 400 тыhыынча солкуобайга батараллара. 2008 сылтан ыла, Мииринэй куоратыгар, дьиэ сыаната аллараа «сурулаабыта». 2009 сыллаахха, маннааҕы кыбартыыра сыаната, Дьокуускай куорат сыаналарыттан икки бүк чэпчии сылдьыбыта. 2 мөл 400 – 2 мөл 600 тыh. солк. сыаналаах 9 этээстээх дьиэлэр кыбартыыраларын сыаналара 1 мөл. 500 тыh. солк диэри аллараа түспүттэрэ. Ол кэмҥэ, Дьокуускайга баар «малосемейкалар» эмиэ ити курдук балтараа мөлүйүөҥҥэ тураллара. Мииринэй куоратыгар, дьиэ атыылааччылар эрэйгэ барбыттара. Атыылаһааччы ахсаана биллэ аҕыйаабыта. Сирэр-талар, сыымайдыыр буолбуттара.
2009 сыллаахха, Мииринэйгэ, «Спальнай» микрооройуонугар баар икки хостоох «сибиэчикэтин» ( КПД. 53 кв.м) Дьокуускай биир хостоох 112-сиэрийэлээх таас дьиэтигэр (2002 сыллаах тутуу. 38. кв.м) атастаспыт биир дойдулаахпын билэбин. Дьокуускайга олохсуйан «абыранаары» маннык сүүйтэриилээх барыйааны талбыт этэ. Үс сылынан, Мииринэйгэ, алмааска да ниэпкэ-гааска да өрүттэннэр, экэниэмикэ балаһыанньата көнөн барбыта. Соҕурууттан кэлээччи элбээбитэ. Дьиэ сыаната эмискэччи «дэгдэс» гыммыта.
2014 сылтан ылата, Мииринэй куоратыгар таас дьиэ сыаната маннык буола сылдьыбыта: 21.кв. м иэннээх, биир хостоох кыбартыыра («малосемейка») – 2 мөл. 300 тыhыынча, 2 хостоох «КПД» (“сибиэчикэ”) таас дьиэ – 3 мөл. 800 тыhыынча. Бэл, биир хостоох толору хааччыллыылаах эргэ мас дьиэ – 1 мөл. 800 тыhыынча. солк. атыыга барыталыыр буолбута.
Маннык быйаҥ олус өр турбата. Билигин, кыбартыыра атыылаhааччы ахсаана биллэрдик аччаата. Оттон, Мииринэйтэн соҕуруу субу бараары, дьиэлэрин атыылыы сатыыр дьоҥҥо бу маннык дьыала букатын табыгаhа суох. Ол иһин ыксаан кыбартыыраларын куортамҥа биэрэллэр. Оттон куортам сыаната Дьокуускайы кытары араа-бараа. 2022 сылга дьэ хайдах-туох буолар?
Станислав Алексеев. Мииринэй куората. Ааптар хаартыската.
