Өлүөхүмэ оройуонун дьаһалтатын пресс-сулууспата иһитиннэрэринэн, ахсынньы 13 күнүгэр, территория сайдыытыгар баһылыгы солбуйааччы Петр Федоров тырааныспар уонна суол-иис хаһаайыстыбатын испэсэлииһин Кирилл Жарковы кытта Балаҕаннаах-Хоро учаастагар тахса сырыттылар. Манна кинилэр Өлүөхүмэ-Дьокуускай кыһыҥҥы суолун тэлии уонна кэҥэтии үлэтэ хайдах саҕаланан эрэрин көрдүлэр-иһиттилэр.
Петр Анатольевич этэринэн, ахсынньы 16 күнүттэн бу суол учаастагар К-700 тыраахтыр кэҥэтии үлэтин оҥорон саҕалыахтаах. «Умнас» кыһыҥҥы суол бэдэрээччигинэн «Дороги Олекмы» тэрилтэ буолар. Бу сылга былырыыҥҥы быһыы-майгы хатыламматын туһугар суолу тэлии үлэтэ эрдэ саҕаланна, бу иннинээҕи сылларга кыһыҥҥы суол официальнайдык тохсунньу 15-20 күннэриттэн арыллар этэ.
