Дьокуускайга хоруона вируһун “омикрон” штаммын бохсорго, хааччахтыырга анаммыт анал обсерваторы арыйдылар. Онно Саха сиригэр “омикрон” көбүөхтээн эрэр дойдуларыттан кэлбит дьону сытыарыахтара. Ити туһунан өрөспүүбүлүкэ вице-премьерэ Ольга Балабкина иһитиннэрдэ.
“Обсерватор ыалдьыбыт дьоҥҥо буолбакка, тастан кэлэр дьоҥҥо анаан арыллар”, – диэн кини чопчулаата. Ол эбэтэр, бу обсерваторга Африкаттан уонна Азия соҕуруулуу-илиҥҥи дойдуларыттан кэлээччилэр киириэхтэрэ. Билигин “омикрон” штамм ол диэки баара биллэр.
Ити дойдулартан Саха сиригэр көтөн кэлбит дьон 14 күн устата булгуччу обсерваторга сытыахтара, икки төгүллээн, ол эбэтэр кэлбиттэрин кэннэ 48 чаас уонна 10-12 күн буолан баран, анаалыс туттарыахтара.
Биллэрин курдук, Дьокуускайтан Африкаҕа да, Азия соҕуруулуу-илиҥҥи да дойдуларыгар быһа эриэйсэ суох. Ол гынан баран, ити эҥээр дойдулартан Москубанан, Санкт-Петербурунан уонна Новосибирскайынан эргийэн кэлэр дьон туһунан иһитиннэрии Роспотребнадзор Саха сиринээҕи салаатыгар күннэтэ киирэ турар.
Ахсынньы 14 күнүнээҕи туругунан, Арассыыйаҕа “омикрон” штаммынан сутуллубут 16 киһи баара биллэр. Саха сиригэр – суох.
