Арассыыйаҕа саҥа хоруона вирус "омикрон" ыстаамын быһаарар тиэст айыллыбыт. Бу туһунан "Россия 1" ханаал биэриитигэр "Вектор" Роспотребнадзор научнай киинин дириэктэрэ Ринат Максютов кэпсээбит. Кини этэринэн, маннык тиэстэри Роспотребнадзор науканан дьарыктанар тэрилтэлэригэр оҥорбуттар.
"Маннык тиэсти туттаммыт, биһиги икки ыйытыкка хоруйдуубут: киһиэхэ COVID-19 уонна "омикрон" ыстаам" баарын-суоҕун тэҥҥэ быһаарабыт", - диэн Максютов кэпсээбит.
Маны таһынан, учуонай бэлиэтээбитинэн, бу тиэстэр билигин лабаратыарыйаҕа чинчийиилэри ааһа сылдьаллар, онтон регистрацияны ааһыахтара уонна олоххо киириэхтэрэ.
Эрдэ этиллибитин курдук, ульяновскай хампаанньа "омикрон" вирус ыстаамын буларга туспа, анал тиэст оҥорбут этэ.
