Киир

Киир

Өрөспүүбүлүкэ Ил Дархана Айсен Николаев дьокутааттарга туһуламмыт Анал Илдьитигэр каадыр боппуруоһун хаста даҕаны таарыйбыта. Ол курдук, биһиги өрөспүүбүлүкэбитигэр хаһыс да сылын “Олохтоох каадыры – бырамыысыланнаска” бырайыак ситиһиилээхтик үлэлиир. Ити кэм иһигэр 10-тан тахса тыһыынча саха дьоно-сэргэтэ араас бырамыысыланнай тэрилтэҕэ үлэҕэ киирдэ. АЛРОСА аахсыйалаах хампаанньа Айхаллааҕы хайаны байытар кэмбинээтин бырабылыанньатын дириэктэрин уопсай боппуруоска солбуйааччы Сергей Домброван этэринэн, ити бырайыак, туох да саарбаҕа суох, өрөспүүбүлүкэ бырамыысыланнай тэрилтэлэригэр каадыр тиийбэт буолуутун быһаарарга төһүү күүс буолар.

“Урут да, хойут да Айсен Сергеевич бырамыысыланнаска олохтоох каадыры сыһыарар туһунан хаста даҕаны этэн турар. Ити боппуруос быйылгы да Илдьиккэ, былырыыҥҥыга даҕаны чопчу ахтыллыбыта. АЛРОСА хампаанньа бэрэстэбиитэлин быһыытынан, ити боппуруоска биһиги салалтабыт уонна өрөспүүбүлүкэ бырабыыталыстыбата ыкса үлэлэһэллэр диэн бигэтик этиэхпин сөп. Холобур, хампаанньа уонна өрөспүүбүлүкэ ситиһиилээх кэпсэтиилэрин түмүгэр, кэлиҥҥи үс сыл иһигэр Айхаллааҕы хайаны байытар кэмбинээккэ 377 олохтоох киһи үлэҕэ киирдэ. Бу – каадыр дэписиитин быһаарар улахан сыыппара. Итини таһынан, олохтоох дьон үлэҕэ киириитэ социальнай дэгэттээх диэххэ сөп. Ол курдук, олохтоох дьон хамнас аахсара нэһилиэнньэ туруктаах буолуутугар дьайар”, – диэн тойон Домброван быһаарар.

Ыспыраапка:

2018 сыллаахха тохсунньу 30 күнүгэр СӨ Дьарыктаах буолуутун судаарыстыбаннай кэмитиэтэ уонна АЛРОСА аахсыйалаах хампаанньа Саха Өрөспүүбүлүкэтин “Олохтоох каадыры – бырамыысыланнаска” бырайыагын олоххо киллэрэргэ бииргэ үлэлэһиэх буолан сөбүлэҥ түһэрсибиттэрэ. Ол быһыытынан, 2018 сылтан 2022 сылга диэри 1 400 олохтоох киһи бырамыысыланнай хампаанньаҕа үлэҕэ киириэхтээҕэ. Ол иһигэр 30-тугар диэри саастаах 320, тыа сиригэр олорор – 320 киһи.

2018 сыллаахха АЛРОСА хампаанньа 950 олохтоох киһини үлэҕэ ылбыта. 2019 сыллаахха – 1 392 киһини. 2020 сыл түмүгүнэн, 1 587 киһи алмаастаах хампаанньаҕа үлэҕэ киирбитэ. Оттон 2021 сыл тоҕус ыйын түмүгүнэн – 2 321 киһи. Бу барыта Саха сиригэр мэлдьи олорор дьон.

Тарҕат:

Санааҕын суруй