Арассыыйа бэрэсидьиэнэ Владимир Путин үгэс буолбут сылы түмүктүүр улахан пресс-кэмпириэнсийэтин Абый улууһун олохтоохторо сэҥээрэн иһиттилэр. Абый улууһун Муҥурдаах нэһилиэгин баһылыга Олег Петрович Корякин дойдубут бэрэсидьиэнин кэмпириэнсийэтин кэнниттэн тыа сиригэр болҕомто ууруллуоҕун сөбүлүү истибитин туһунан санаатын үллэһиннэ:
- Аҕа баhылыкпыт В.В. Путин этиилэриттэн ордук кэлэр сылларга тыа сирин сайдыытыгар туһаайыллар программалар киириэхтэрин биhирээтим. Араас бырайыактар үлэлиэхтэрэ, тыа дьонун олоҕо тупсарыгар эбии үп көрүллүө диэбитин үөрэ иhиттибит. Национальнай проект чэрчитинэн сайдыы суолугар үктэнэрбитин, тыа сиригэр дьон олоҕо тупсарын эрэннэрдэ. Оччоҕо эдэр ыччат тыа сиригэр кэлэн олохсуйуо, ахсааммыт да элбиэ этэ.
Биhиги биир сүрүн кыhалҕабыт интернет. Кытыы нэhилиэктэргэ интернет киириэн, аныгытаhымнаах үөрэх сайдарыгар төhүү күүс буолуоҕун эттэ. Бу ыраах хоту сир оҕолоро күөмчүлэммэккэ, билиӊӊи ирдэбилгэ эппиэттиир билиини ылалларыгар кыах биэрэр. Ол курдук биһиги оскуолабытыгар бу аҕыйах хонуктааҕыта «Үөрэхтээһин» национальнай бырайыак чэрчитинэн "Точка роста" федеральнай бырайыагынан естесственнай хайысхаларга киин арыллан үлэтин саҕалаата.
Элбэх оҕолоох ыалларга сир учаастага түӊэтиллэр. Инфраструктураны сайыннарарга регионнар үптэрэ тиийбэтинэн туспа анал сыаллаах-соруктаах федеральнай программа ылылларыгар этии киирбитин саамай сөп дии саныыбын.
Билигин тирээн турар долгутуулаах боппуруос – ковидтан харыстанар быhыыны ылыы. Президен саҥа сылга дойду үрдүнэн коллективнай иммунитет 80% буоларын ситиhэргэ нэһилиэнньэҕэ өйдөтүү үлэтин ыытар наадатын эттэ. Биhиги нэhилиэкпит олохтоохторо быhыыны ылары табатык өйдөөн, билиҥҥи тургунан 90% ылан олоробут. Онон ыарыыны утарсар бигэ тирэхтээхпит.
Үлэтэ суох буолуу Россия үрдүнэн пандемия саҕаланыаҕыттан туруктан намтаабытын бэлиэтээтэ.Бу эмиэ дьон олоҕо тупсан эрэрин көрдөрөр. Онон дойдубут салайааччыта кэлэр сылларга сайдыыбыт саҥа туhаайыыларын туһунан этиилэрэ инникигэ эрэлбитин үксэттэ.
