Ааспыт өрөбүллэргэ Мииринэйгэ Сунтаартан сылгы, Бүрээтийэттэн ынах этэ ырыынакка атыылаабыттарыгар былдьаһыы-тарыһыы бөҕөтө.
Сибиэһэй (“Парной”) эппит дуостал мэлигир буолан итинник буолабыт. Даҕатан эттэххэ, ахсынньы 20 күнүгэр, «Таас-Үрэх-Верхнемарково» кыһыҥҥы суол арыллаатын кытары, Иркутскай уобаластан бородуукта тиэммит фура арааһа кэлитэлээн эрэр. Ыраахтан, бэл Бүрээтийэттэн кытары кэлитэлииллэр эбит. Сорох фуралар Ленскэй, Айхал, Удачнай диэки барыталаатылар.
«Юбилейнай» эргиэн Киинигэр, ол эбэтэр куорат ырыынагар, ааспыт өрөбүллэргэ дьон ыы-быччары муһунна. Сунтаар Уһун-Күөлүттэн туох да сүрдээх эмис убаһа этин аҕаланнар дьон хото атыыласта. Эбиитин удамыр сыанаҕа атыылааннар дьон санаата биллэ көнньүөрдэ. Ол эрэн, хап-сабар атыылаан, хараҥара илигинэ Сунтаардаабыттара.
Оттон таһырдьатааҥҥы эрээттэргэ, дьон, Бүрээтийэттэн аҕалыллыбыт ынах этин бааччаҕынан, атаҕынан, амынньыарынан үлүмнэһэн ыллылар. Уочарат буола сырытта. Дьон илиитэ сыалаах куһуокка тиксээри бирэмээнэ эп-элэҥнэс. Ол быыһыгар моргуор да тахса сыһар.
Быйыл, хамсыктан сылтаан, сибиэһэй эт Мииринэйгэ кэлиитэ букатын сэдэх. Убаһа этин дэҥҥэ көрөр буоллубут. Куһаҕана сүрдээх. Олус диэн хараарҕаатыбыт.
Станислав Алексеев. Мииринэй куорат.
