Биллиилээх шоумен, көрү-нары көҕүлүттэн туппут артыыс Клим Федоров, бэйэтин Инстаграмм сирэйигэр кинини «Якутянин года» бириэмийэҕэ туруорбуттарын туһунан иһитиннэрдэ уонна кини туһугар актыыбынайдык куоластыылларыгар сурутааччыларын ыҥырда.
Федоров кандидатуратын урбаанньыт Ольга Григорьева туруорда, кини этэринэн ыытааччы «көрдөөх-анрдаах тэрээһиннэринэн, көрсүһүүлэринэн куорат уонна өрөспүүбүлүкэ олохтоохторун сэргэхсиппит, кыһалҕалаахтарга күүс-көмө буолбут». Кини, Клим Федоровы «саха саарынынан уонна аата-суола үйэлэргэ хаалар киһитинэн» аахпыт.
Барыта этэҥҥэ ааһыаҕын, ыытааччы олоҕуттан биир көстүү номинацияҕа киирсэргэ харгыс үөскэппит. Бу иннинэ, аҕыйах сыллааҕыта Клим Федоров актыыбынайдык дьону-сэргэни финансовай пирамидаларга угуйа сылдьыбыта биллибит.
Бастаан, бу туһунан Саха сиригэр киэҥник биллэр @yktpublic паблик суруйда:
“Ыытааччы халбаҥ финансовай пирамидалары хамсатааччылартан биир сүрүн биирдэстэрэ этэ, ону таһынан, араас саарбах атлас-исписэлиистэри, астрологтары, инфоцыганнары, сымыйа БАД-тары эрэкэлээмэлээһиҥҥэ, сокуонунан көҥүлэммэт хамсыгы быһаарар экспресс-тиэстэри атыыга барытыгар актыыбынай кыттыыны ылара”.
Блогер Алена Алексеева артыыс бастыҥнар бириэмийэлэригэр турбутун утарда:
«Киһи эрэ бэркиһиир. Хайдах-туох үйэҕэ олоробут? Федоров кырдьаҕас дьону итэҕэйимтиэлэринэн туһанан финансовай пирамида бөҕөлөрүгэр киллэртээбитэ. Хайдах итинник киһини – сыл бастыҥа оҥоруохха сөбүй? Ольга Григорьеваҕа кини – дьоруой. Дьон хараҕын сабаары ыалдьар дьоҥҥо харчы хомуйбут. Григорьева ол иһин кинини үчүгэй киһинэн аахпыт».
Клим Федоров социальнай ситимигэр 109 тыһ. сүгүрүйээччилээх. Бу дьон талааннаах артыыс туох да сүөргүнү оҥорботох диэн ааҕаллар. Пирамидаларга угуйуу эмиэ туһунан талаан дэһэллэр. Ону таһынан, кинилэр сөбүлүүр артыыстара аһымал санаа тэрээһиннэринэн дьарыктанар, ыарыһахтарга көмөлөһөр. Социальнай ситимнэргэ Клим Федоров тула сытыы дискуссиялар оргуйан турдулар. Ким сэмэлиир, ким көмүскэһэр.
Бэлиэтиэҕи баҕарыллар, кэнники сылларга финансовай пирамидаларга элбэх дьон киирэн биэрэр, олохторо алдьанар. Дьону түргэн харчынан мэҥиэлээн угаайыга киллэрэр – сиэрэ суох быһыы. Билиҥҥи үйэҕэ бастыҥ бириэмийэҕэ саарбах репутациялаах эрээри, элбэх сүгүрүйээччилээх дьон тураллара аны кими да соһуппат.
