Казахстан бэрэсидьиэнэ Касым-Жомарт Токаев Мангистаускай уобаласка уонна Алматыга, ураты бэлэмнээх буолуу эрэсиимин киллэриигэ илии баттаата.
Ураты бэлэмнээх буолуу эрэсиисэ тохсунньу 5 күнүттэн тохсунньу 19 күнүгэр диэри салҕаныаҕа.
Казахстан арҕаа өттүгэр автомобильнай гаас сыанатын үрдээһиниттэн сылтаан, бырачыастар саҕаланнылар. Уматык сыанатын түһэрэллэрин былаастар мэктиэлээбиттэрин да кэнниттэн долгуйуу дойду атын эрэгийиэннэрин кытта иилэ хапта.
Тохсунньу 1 күнүттэн массыына уматыгар туһаныллар гаас 60 тенгеттан 120 тенгеҕа тиийэ үрдээбитэ. Икки күннээҕи миитин кэнниттэн, Мангистаускай уобалас сапыраапкаларын бас билээччилэрэ сыананы 80-90 тенгеҕа түһэрбиттэрин да үрдүнэн, бырачыастааччылар маны ситэтэ суоҕунан аахтылар. Бырачыас долгуна номнуо Нур-Султаҥҥа, Карагандаҕа, Атырауга, Уральскайга, Талдыкоргаҥҥа, Кыһылордаҕа уонна Шымкеҥҥа тиийэ тарҕанна.
Sputnik агентство тиэрдэринэн, Алматыга баар Өрөспүүбүлүкэ аатынан болуоссакка силовиктар дьону утары номнуо светошумовой гранаталары туһанан эрэллэр. Мустубут бырачыастааччылар полицейскайдар массыыналарын үнтү сынньан бардылар, биир полиция үлэһитин кырбаатылар. Үгүс дьон болуоссатан күүс өттүнэн үтүрүлүннэ.
