Доруобуйа Харыстабылын миниистирэ Михаил Мурашко иһитиннэрэринэн, Арассыыйа хас да эрэгийиэннэригэр "омикрон" диэн хамсык биир көрүҥэ дойдуттан ханна да айаннаабатах дьоҥҥо бэлиэтэннэ.
Бырааһынньык күннэригэр, мэдьиссиинискэй көмө оҥорор суһал ыстаап мунньаҕар Мурашко эттэ: "Билигин саҥа штамм түбэлтэлэрэ кэлии буолбатахтар. Аны бэйэбит испититтэн көстөр буоллулар. Эрдэтинэ миэрэлэри ыллахха сатанар. Вирус олус түргэнник тарҕанар дьайыылаах, ол иһин соччонон кутталлаах".
Миниистир бэлиэтииринэн, арассыыйа учуонайдара айан таһаарбыт вакциналара көдьүүстээҕэ бигэргэтилиннэ. Ордук чорботон "Спутник V" арҕаа дойдулар быһыыларыттан күүстээҕин туһунан эттэ. Доруобуйа Харыстабылын салайааччыта тоһоҕолоон туран бэлиэтээтэ: "Үгүс дойдуга биһиги ыарыы үүнэ-тэһиинэ суох төлө барбытын көрөбүт. Ыалдьыбыт дьон ахсаана номнуо тыһыынчанан, мөлүйүөнүнэн ааҕыллар. Маннык кытаанах быһыыга-майгыга хамсыгы утары быһыыны ылары уонна ревакцинацияны ыларга кытаатыахха наада".
