Сааскы халаанынан сибээстээн Саха сиригэр ыарахан балаһыанньа үөскээтэ. Өрөспүүбүлүкэ үрдүнэн 17 нэһилиэнньэлээх пууҥҥа 824 уһаайба, 424 олорор дьиэ ууга барда. Билигин да халаан ааһа илик. Күнү-дьылы кэтээн көрөөччүлэр кэккэ нэһилиэктэри уу өссө да ылыан сөбүн сэрэтэллэр.
Былыр-былыргыттан саха норуота ыарахан кэмҥэ биир сомоҕо курдук бэйэ-бэйэбитигэр көмөлөһөн, баччааҥҥа диэри омук быһыытынан ордон кэллэхпит. Сааскы халаантан Саха сирэ элбэхтэ эмсэҕэлээн кэллэ. Онуоха халаан содулун туоратыыга олохтоохтор күүскэ түмсэн, кыһалҕалаахтарга көмөлөһөр үтүө үгэстээхпит. Ол сиэринэн, билигин эмсэҕэлээбит дьоҥҥо көмөлөһөр сыаллаах кэккэ тэрилтэлэр, биирдиилээн дьон биир күннээҕи хамнастарын биэрдибит, малы-салы хомуйаллар. 2001 сыллаахха Ленскэй куората ууга барбытыгар биир да киһи туора турбатаҕа. “Норуот күүһэ – көмүөл күүһэ” диэн мээнэҕэ эппэттэр.
Ытыктабыллаах Саха сирин олохтоохторо! “Кыым” норуот хаһыата сааскы халаантан эмсэҕэлээбит кыһалҕалаах дьоҥҥо ким туох кыахтааҕынан көмөлөһөргүтүгэр ыҥырар!
Халаан уутуттан эмсэҕэлээбит дьоҥҥо саҥа, ыраас малы-салы, аһы-үөлү, таҥаһы-сабы хомуйууга эрэдээксийэҕэ анал пуун тэрийдибит. Көмөлөһүөн баҕалаахтары үлэ кэмигэр Дьокуускай куорат, Киров аатынан уулусса 18, блок В, 709 офиска күүтэбит. Сиһилии билсэр төл: 8-967-912-01-48, 8-914-227-28-43.
Ким кимиэхэ тугунан көмөлөспүтүн барытын аһаҕастык иһитиннэрэри мэктиэлиибит.
Ыксаллаах быһыыга – түмсүүлээх буолуоҕуҥ!
Сэҥээриилэр
Сунтаардар Чанчык микрорайону туппуттара. Студеннар уонна 15 улуус волонтердара Ленскэй куораты халаан мусорыттан ыраастаабыттар, суол асфааллаабыттара, стадиону ремоннаабыттара.