Киир

Киир

Өрөспүүбүлүкэтээҕи суһал ыстаап чахчыларыттан Мииринэй туһунан анаардахха киһи эрэҥкэдийэрэ суохха дылы. Суос тыыннаах “Омикрон” штаммата сээбэҥниир. Мииринэй курдук кэлии-барыы дойдутугар, ол баҕайы, түргэнник кэлиэн сөп.

Күн-бүгүн, Мииринэйдээҕи ковид госпиталын ыарыһахтарын үгүстэрэ эдэр дьон буолаллара дьиксиннэрэр. Мииринэйгэ, эдэр ыччаты, ончу кыайан хонтуруоллаабатылар. Олоруҥ таптаабыттарынан, холуоннук сылдьаллар. Маарыла бэбээски кэтиини, “социальнай дистанцияны” төрүт дьаалайбаттар. Таптаабыт дьиэлэрин домофонун куодун хантан эрэ була охсон киирэн көҥүл айбардыыллар. Подъезтар ахсын бөлөҕүнэн мусталлар. Кыыстыын-уоллуун, үөстэрин таттаран үөгүлүүр-хаһыытыыр, алларастыыр, үөхсүү былаастаах кэпсэтэр дьаллыктаахтар. Пиибэлииллэр, хатан «энергетик» утахтарын хантаталлар, түлүппүөнүнэн оонньууллар.

Мин олорор дьиэм подъеһын холохойго кубулуттулар. Ханна да үҥсэ сатаа – дуостал ким да тарбаммат. Дьэ олоруҥ буоллаҕа дии хоруона хамсыгын тарҕатар кыахтаах обургулар. Бэлиэтээн эттэххэ, бастакы хоруона хамсыктаах ыарыһах Мииринэйгэ 2020 сыл муус устар ый 15 күнүгэр бэлиэтэммитэ. Кини Москубаттан кэлбитэ. Онуоха диэри, Мииринэй, хоруона хамсыгын ыарахан тыынын билбэккэ олорбута.

Онтон нефть хостуур хампаанньа баахтатын үлэһиттэрэ маассабайдык ыалдьааттарын кытары, ыам ыйыгар, Мииринэй балыыһатын стационара 50 куойкалаах ковиднай госпитальга уларытыллыбыта. Сүүсчэкэ киһиэхэ аналлаах обсерватордар «Горняк» профилакторийга, МПТИ уопсайыгар, наркологияҕа тэриллибиттэрэ. “Кыһыл” ковиднай зона 6, кэлин 10-24 миэстэлээх реанимацияламмыта. Провизорскай салаа баар буолбута.

Билигин, балыыһа куойкатын ахсаана сүүс, сүүс отут иһинэн-таһынан халбаҥныыр. Дьиҥинэн алта уонча киһиэхэ анаммыт эрээри. Үүммүт 2022 сыл тохсунньу ыйыгар, хоруона хамсыгын тула балаһыанньа, Мииринэйгэ бэрдэ суох. Мииринэй балыыһатын эмчиттэрин бэйэлэрин харыстаммат быһыыларынан эрэ сүрүннэнэр, боһойуллар.

Станислав Алексеев. Мииринэй куората. Ааптар фотота.

Тарҕат:

Санааҕын суруй