Тохсунньу 17 күнүгэр, 33 пленарнай мунньахха, Ил Түмэн дьокутааттара өссө төгүл лаппыйан туран, бүтэһиктээхтик "Дьиэ харамайдарын кытта эппиэтинэстээх сыһыан" диэн Федеральнай сокуоҥҥа уларытыылары киллэрии туһунан ырытыһыахтаах этилэр.
Чопчулаан эттэххэ, дьокутааттар сокуоҥҥа икки уларытыы киллэриэхтээх этилэр: бэтэринээрнэй ньымалары туһанан дьэллик ыттары сиэрдээхтик утутуу (суох оҥоруу) уонна тутуллубут бырадьаагы ыттары төттөрү төрүт эйгэтигэр аттаан баран ыытыы туһунан пууну сокуонтан суох оҥоруу туһунан.
Сокуон бырайыага Саха сириттэн Арассыыйа Судаарыстыбыннай Дууматыгар талыллыбыт дьокутаакка Галина Данчиковаҕа атаарыллан, РФ КОаП нуорматыгар 2022 сыл тохсунньу 17 күнүгэр диэри олоххо киириэхтээх этэ.
Ол эрээри, 33 пленарнай мунньахха бу сокуон бырайыагын ырытыы кыайан киирбэтэ.
Ил Түмэн пресс-сулууспата тиэрдэринэн: "Саха сирин олохтоорхторун, уопсастыбыннаһын санаатын биир кэлим көрүүгэ мунньар гына, уонна улуустартан, Дьокуускай куораттан киирэр элбэх этиилэри учуоттаан туран, ыт боппуруоһун ырытыы атын болдьоххо көстө".
Ол оннугар дьокутааттар атын боппуруостары ырытар буоллулар: былырыын болдьоҕо бүтүөн иннинэ ыалдьан өлбүт Арсентий Николаевтан уонна былырыын Айылҕа Харыстыбылын миниистиринэн анаммыт Евгений Перфильевтан дьокутаат боломуочуйаларын устар туһунан уонна үрдүкү былааска олохтоох бэйэни салайыныы тэрийии уопсай бириинсиптэрин көрүүнү.
Бу иннинэ, "Дьиэ харамайдарын туһунан эппиэтинэстээх сыһыан" туһунан Федеральнай сокуону олоххо киллэрбит РФ Судаарыстыбыннай Дууматын дьокутаата Владимир Бурматов Саха сирин дьокутааттара кини таһаарбыт сокуонугар уларытыылары киллэрэ сатылларын таах халтай эрэйдэнэллэр диэбитэ, онно эбии ким эмитэ бэйэтэ дьаһанан ыттары ылыстаҕына холуобунай эппиэтинэскэ тардыллыа диэн суоһурҕаммыта.
