«Интерфакс» сонуннарыттан көрдөххө, Америка Холбоһуктаах Штаттарыгар устуоруйаҕа аан бастакытын, Дэвид Беннет диэн 57 саастаах киһиэхэ генетиканан чугаһытыллыбыт сибиинньэ сүрэҕин олордубуттар. Эппэрээссийэ этэҥҥэ ааспыт диэн The New York Times иһитиннэрэр.
Мэриленд Үнүбэрситиэт Мэдиссиинискэй киинин хирург быраастара этэллэринэн, эппэрээссийэлэммит киһи туруга үчүгэй. Кини билигин даҕаны ускуустубаннай хаан эргиирин оҥорор аппараакка холбонон сытар. Саҥа сүрэх этэҥҥэ иҥэн, эт-сиин үлэтин улахан аҥаарын сөпкө оҥорор эбит. Ол эрээри, The New York Times суруйарынан, пациент инники туруга чопчу үчүгэй буолуоҕун туһунан эрэннэриини этэр эрдэ. Гынан баран, киһиэхэ ордук кутталлаах буолуон сөптөөх, дуонар буолбут сүрэҕи «атыҥырыыр» кэрдииһэ (48 чаас) этэҥҥэ ааспыт.
Беннетт сүрэххэ дуонар көстүбэтэҕин уонна доруобуйатын туруга ыараабытын иһин, маннык эппэрээссийэни ааһарга сөбүлэҥин биэрбит эбит.
«Эбэтэр өлөбүн, эбэтэр маннык эппэрээссийэни ааһабын», — диэн Беннет эппэрээссийэ иннинэ санаатын эппит.
