Саха сирин суһал ыстаабын киинэ иһитиннэрэринэн, тохсунньу 20 күнүнээҕи туругунан, саҥа хоруона вируһунан 761 сутуллуу баара билиннэ. Бу – хамсык саҕаланыаҕыттан муҥутуур элбэх көрдөрүү! Дьиҥинэн, эрдэттэн куттанар сыыһа, СOVID-19 ыарыыны үгүс киһи чэпчэкитик аһарына сылдьар эбит. Ол эрээри, бэҕэһээҥҥи туругунан, биир да киһи үтүөрэ илик, оттон 3 киһи өлөөхтөөбүт эбит.
Дьокуускайга бу ыарыыттан сылтаан 87 киһи балыыһаҕа киирбит, Мэҥэ-Хаҥаласка – 10, Горнайга уонна Уус Алдаҥҥа - 3-түү киһи, Алдаҥҥа, Өлүөхүмэҕэ уонна Хаҥаласка – иккилии, Үөһээ Бүлүүгэ, Бүлүүгэ, Намҥа, Нерюнгрига, Ньурбаҕа, Өймөкөөҥҥө, Сунтаарга – биирдии.
Маны таһынан, стационарга 7 киһи оҕо киирбит.
Балыыһаларга ыарахан туруктаах 66 пациент баара биллэр. Оттон реанимацияларга үрүҥ халааттаах аанньаллар 10 ыараханнык ыалдьыбыт киһини эмтииллэр. Бу дьон бары быһыыны ылбатахтар эбит.
Бүгүҥҥү туругунан, Саха сиригэр 551 699 киһи быһыыны ылбыт, ол эбэтэр нэһилиэнньэ 77% эбит.
