Киир

Киир

Бу тоҕус этээстээх монолит-каркаас тутуу дьэндэтиллибитэ быйыл алта сылын туолар. 71 кыбартыыралаах дьиэни, бастакы бэдэрээччит кыамматаҕыттан сылтаан, итинник быһыы-майгы үөскээбит. Балачча кэм, тутуу кураанахсыйан, иһийэн турда... Былырыын, атын бэдэрээччит кэлэн, үлэ-хамнас “сүнньүн” булуохча буолбута. Дьиэни төрдүс кыбаарталга киллэрэбит диэн былаастар биллэрбиттэрэ баара.

Бэҕэһээ, бу дьиэҕэ, икки үлэһит оскуонньалары (дьиэ эркинин тулалыыр далаһа мастар. Нууччалыыта - “леса”) бэрийэ сылдьаллара. Ол аата халлаан сылыйда да үлэ тэтимирииһик.

Маҥнай утаа, бу тутуу, “Учууталлар дьиэлэринэн” биллэр эбит буоллаҕына, аны билигин, «Бүддьүөт үлэһиттэрин дьиэтэ» диэн ааттанар. Былырыыҥҥаттан, саҥа бэдэрээччит тутууну муус устар ыйыттан ылата сөргүтэн, хамсааһын тахсан испитэ. Дьиэ истиэнэлэрин боолдьоҕунан уонна уу өппөт матырыйаалларынан бүрүйүү үлэлэрэ сайын чээрэтигэр, күһүн ыытыллыбыттара.

Дьиэ иэнэ – 397,17 миэтэрэ. 71 кыбартыыра хомуур иэнэ – 2,506,96 м. Олус улахана суох дьиэ дьиҥэр. Тоҕус этээстээх дьиэ тас бүрүөһүнэ биир эрэ өттө уолдьаспыт. Илин диэки эркин онон-манан эрэ билииккэ бүрүөһүннээх. Оскуонньанан тилэри сыһыарыллан баран нэлэйэн турар.

Дьэ, хаһан ситэрэн-хоторон бүтэрэллэр?

Станислав Алексеев. Мииринэй куората. Ааптар хаартыската.

Тарҕат:

Санааҕын суруй