Дьокуускай куорат Кальвица уулуссатыгар турар, 5-с нүөмэрдээх бэликилииникэтигэр, дьон COVID-19 тиэстин туттараары, уһун уочаракка турда. Манна, бэл, сорох таһырдьа турар хаартыскалара куйаар ситимнэрин устун тарҕанна.
«Саҥа хоруона вируһунан сутуллууга уорбаланар дьон таһырдьа уочаракка туралларыгар тиийдилэр», - диэн «инстаграм» «КримЯкутия» паблига суруйар.
Маны таһынан, 1-кы нүөмэрдээх бэликилииникэҕэ эмиэ уһун уочарат үөдүйбүт. «КримЯкутия» паблик сурутааччыта ол онно турар хаартыскатын таһааттарбыт.
«Балыыһа иһигэр ыалдьыбыт дьон өссө элбэхтэр. Ыҥырбыт бырааспыт кэлбэтэ, ол иһин бэйэбит кэллибит. Уочаракка ыалдьыбыттар үтүөрэн эрээччилэри кытта бука бары бииргэ турабыт», - диэн кини суруйар.
Бу иннинэ, 3-с бэликилииникэҕэ эмиэ халыҥ уочарат үөдүйбүтүн туһунан видео тарҕаммыта.
Санатар буолахха, тохсунньу 24 күнүнээҕи туругунан, Саха сиригэр саҥа хоруона вируһунан ыалдьыбыт киһи ахсаана хаһааҥҥытааҕар даҕаны муҥутуур элбэх буолла - 1211. Субу мантан Дьокуускай куоракка ыалдьыбыт киһи ахсаана 921! Онон, чахчы даҕаны, ыарыыбыт сүрдэммит!
Сэҥээриилэр