Киир

Киир

Саха сиригэр Саҥа дьыл бырааһынньыктара ааһааттарын кытта, сыыйа ыалдьыы эмиэ улаатан барда. Тохсунньу 20 чыыһылатын кэнниттэн күн ахсын хамсыкка ыалдьыы муҥутуур элбэх түбэлтэтэ бэлиэтэннэ. Бүгүҥҥү туругунан, Дьокуускай куоракка – 1659. Улуустарбытыгар эмиэ көрдөрүү олус үрдүк, реанимацияларга киһи бөҕө сытар.

 Маршрутизацияны уларытарга

“Доҕоттоор, балаһыанньа ынырык, дьиҥнээх коллапс буолла”, – дииллэр социальнай ситимнэргэ эмчиттэр бэйэлэрэ. Кырдьык, бастакы сүһүөх мэдиссиинэҕэ ноҕурууска улаатан, дьон куорат поликлиникаларыгар баар унньуктаах уһун уочаракка тоҕуоруһуута, быраастар үстүү-түөртүү хонугу быһа ыарыһахтарга кэлбэттэрэ, үтүөрбүт дьон бүлүтүөн ылаары үс чааһы быһа ыалдьыбыт дьону кытта биир уочаракка тураллара, о.д.а. туһунан бассаап толору.

Ил Дархан Айсен Николаев Бырабыыталыстыба бэрэссэдээтэлэ Ольга Балабкинаны уонна миниистир Лена Афанасьеваны кытта көрсүбүт, ити боппуруостары дьүүллэспит. Дьон киниэхэ аадырыстаан суруйбуттарын туһунан кэпсэтии буолбут. Онон, дьон туһугар үлэни тупсарар сыаллаах, маршрутизацияны сөпкө тэрийэр, ыарыһаҕы көрүүнү араарар наадата этиллибит. Биир улахан дьиэҕэ амбулатория тэрийэр наада диэн, Успуорт министиэристибэтэ “Триумф” успуорт дыбарыаһын бу сыалга-сорукка аныыр туһунан быһаарбыт. Бүгүҥҥүттэн “Триумфка” амбулатория киинэ үлэлээн барыа диэбиттэр. Аны куоракка ыарыы хонтуруолга сылдьар, көмө оҥоһуллар эбит буоллаҕына, тыа сирэ хайдах туруктааҕый? Сорох улууска ыарахан быһыы-майгы диэн суруйаллар. Ол туһунан сиһилии суруйуохпут.

Сэриигэ курдук

“Балаһыанньа олох байыаннай” диэбиккэ дылы, оонньуута суох, оннук. Халҕаһалыы анньан кэлбит ыарыыга, урукку систиэмэ ноҕуруускаланара өйдөнөр. Онон “эмчиттэр тиийбэттэр” диэн, үлэлээбэккэ олорор быраастары мобилизациялыыр туһунан өрөспүүбүлүкэ премьер-миниистирин солбуйааччыта Ольга Балабкина тохсунньу 25 күнүгэр иһитиннэрдэ. Оттон ХИФУ мединститутун бэрэпиэссэрдэрэ, учуонайдара колл-кииннэри нөҥүө мэдиссиинэ консултаассыйатын биэрэн эрэллэр.

Куоракка баар эмтиир тэрилтэлэргэ араас министиэристибэлэр уонна биэдэмистибэлэр анаан-минээн, босхо 63 авто-тырааныспар биэрбиттэр диэн суруллубут. Уопсайынан, ыарыыны утары туох баар күүһү бырахпыттар. Мэдиссиинэ колледжын уонна ХИФУ мединститутун 319 устудьуона маладьыастаабыттар, балыыһаларга үлэлии сылдьаллар. Кинилэр эмиэ ыарыы саамай тыҥаан турар кэмигэр “мобилизацияламмыттар”.

8 (4112) 506353 – СӨ Доруобуйа харыстыбалын министиэристибэтин каадыр отделын төлөпүөнэ.

Нина Герасимова матырыйаалыттан

Тарҕат:

Санааҕын суруй