Киин куорат биир оскуолатыгар икки оҕо сэлликтээбитэ биллибит. Биир үөрэнээччи сэллигэ номнуо аһаҕаска кубулуйбут.
Оскуола дириэктэрэ Наталия Федорова иһитиннэрбитинэн, билигин ыалдьыбыт оҕолор балыыһаҕа киирбиттэр. Оскуолаҕа Манту пробатын ылалларыгар, ыарыһах оҕо дьиэтигэр ыалдьан сыппыт. Роспотребнадзорга иһитиннэрбиттэринэн, ыарыһахтары кытары алтыспыт дьоҥҥо ФЛГ, Манту, эбии чинчийии ыытыллыбыт. Саҥа ыарыһахтары булбатахтар. Сэллик киинэ дьиэлэригэр баар буолан, оҕолор онтон сыстыбыттар.
