Cаха сиригэр Хотугу төрүт олохтоох аҕыйах ахсааннаах омуктар Ассамблеялара тэриллэр. Бу туһунан бүгүн Ил Түмэн Арктика уонна аҕыйах ахсааннаах хотугу норуоттар дьыалаларыгар сис кэмитиэтин мунньаҕар эттилэр.
Ассамблея Ил Түмэни кытары хотугу аҕыйах ахсааннаах норуоттар интэриэстэрин туруулаһыыга, бырааптарын көмүскүүргэ бииргэ үлэлиир буолуоҕа.
Ил Түмэн дьокутаата Елена Голомарева бэлиэтээбитинэн, маннык Ассамблея тэриллэн, нэһилиэк, оройуон, сокуону оҥорор былаас уорганнарын бииргэ түмэр кыахтаах. Онон эһиил Ассамблея Арктика суонатыгар улахан үлэни ыыппыта көстүө диэн эрэллээх.
Ассамблея Ханты-Мансийскай уокурук уопутугар олоҕуран тэриллэр. Оттон Саха сиригэр бу Ассамблея парламент иһинэн үлэлиэҕэ. Инньэ гынан, дьокутааттар куорпустарын кытары бииргэ алтыһан үлэлиирэ ордук тоҕоостоох буолуоҕа. Ассамблея тэриллиитин туһунан сокуон таһымыгар бэс ыйын 30 күнүгэр бигэргэтиллиэҕэ.
