Бэҕэһээ Москубаҕа Саха АССР биллэр-көстөр бэлитиичэскэй уонна уопсастыбаннай деятель, ССРСка уонна РСФСРга бырамыысыланнаһы тэрийээччи Степан Васильевка өйдөбүнньүк дуосканы үөрүүлээх быһыыга арыйдылар.
Саха сирин бастакы салайааччыларыттан биирдэстэригэр аналлаах өйдөбүнньүк мэҥэ бэлиэ Спиридоновка уулусса 26-с №-дээх дьиэтигэр арылынна.
Бу дьиэ үс хостоох кыбартыыратыгар Степан Васильев 1928-1939 сс. олорбута. Кини оччолорго сымыйанан Япония туһугар үспүйүөннээһиҥҥэ балыырга түбэһэн тутуллубута. Степан Васильев 1943 сыллаахха Коми АССР Кожвинскай оройуонун Канин Нос бөһүөлэгэр (билиҥҥитэ Печора куорат) бэлитиичэскэй хаайыылаахтар лааҕырдарыгар сылдьан өлбүтэ. Кини үтүө аата 1956 сыллаахха чөлүгэр түспүтэ.
Саха сирин бастакы наркомнарыттан биирдэстэрэ Степан Васильев ССРСка уонна өрөспүүбүлүкэҕэ көмүс бырамыысыланнаһын сайдыытыгар улахан кылаатын киллэрбитэ. Өҥнөөх тимири уонна кыһыл көмүһү хостуур, таҥастыыр оробуочайдар Сойуустарын Киин Кэмитиэтигэр бэрэссэдээтэллээбитэ, Москубаҕа партийнай уонна хаһаайыстыбаннай дуоһунастарга үлэлээбитэ.
Степан Васильевка мэҥэ дуосканы туруорарга икки сыллааҕыта кини сиэн быраата Эдуард Данилов туруорсубута. Маныаха Москубаҕа Саха сирин бастайааннай бэрэстэбиитэлистибэтэ ГЧИ уонна РАН Арассыыйа устуоруйатыгар институтун кытары архыыбы хаһан улахан үлэни ыыппыта. Мемориальнай дуосканы скульптор Владимир Курочкин оҥорбут.
Дуоска үөрүүлээх арыллыытыгар постпред Юрий Куприянов, Степан Васильев биир дойдулаахтара – Ньурба улууһун делегацията, Эдуард Данилов кэргэниниин, Москубаҕа олорор сахалар, дьиэ олохтоохторо кытыннылар. Бочуоттаах ыалдьытынан Москуба куорат национальнай бэлиитикэҕэ уонна эрэгийиэннэр икки ардыларынааҕы сибээскэ департаменын салайааччы Виталий Сучков буолла. Кини мустубут дьоҥҥо үтүө тылын тиэртэ уонна Юрий Куприяновтыын аалай лиэнтэни быста.
