Бүгүн, Оҕо көмүскэлин күнүгэр, “Бэлэм буол+” хаһыат уонна “Хатан” сурунаал “Икки сулус” оҕо саас бырааһынньыгын ыыттылар. Бу күн оҕо аймах истиҥ мичээриттэн тулабыт үөрүүнэн туолла.
Бырааһынньык үөрүүлээх аһыллыытыгар оҕолору Ил Түмэн билимҥэ, үөрэххэ, култуураҕа, иһитиннэрэр-көрдөрөр эйгэҕэ уонна уопсастыбаннай тэрилтэлэр дьыалаларыгар сис Кэмитиэтин бэрэссэдээтэлэ А.А. Григорьева, СӨ үөрэх миниистирин солбуйааччы Ф.В. Габышева, “Почта России” Саха сиринээҕи филиалын дириэктэрэ А.В. Суслов, “Бэлэм буол+” хаһыат сүрүн эрэдээктэрэ А.А. Кузьмина эҕэрдэлээтилэр.
Бырааһынньык саамай кэтэһиилээх түгэнинэн “Икки сулус” талааннаах оҕолор күрэстэрэ буолла. Күрэскэ Дьокуускай куорат анал коррекционнай оскуолаларын үөрэнээччилэрэ кытыннылар. Кинилэргэ өрөспүүбүлүкэ биллиилээх артыыстара көмөлөстүлэр.
Дьүүллүүр сүбэ быһаарыытынан кыайыылааҕынан Валя Бонячук ааттанна. Кини биллэр хомусчут, ырыаһыт Василена Шариналыын ыллаата. Ону таһынан көрөөччүлэр биһирэбиллэрин “Поющие сердца” бөлөх оҕолоро Коля Ефимов, Лёва Павлов, Валя Заиграева ыллылар.
Бу күн “Папа, мама, подписка и я” аахсыйаҕа оҕо ааҕыытын, хаһыат, сурунаал үлэтин өйүүр дьон, тэрилтэлэр кытыннылар. Сурутууга көхтөөхтүк кыттыбыт күндү дьоммутугар махтанабыт!
