Саха сиригэр “Хотугу мозаика” диэн туристическай кластер арыллыахтааҕа. Маныаха сүүһүнэн мөлүйүөн солк. үп көрүллүбүтэ да, кластер кумааҕыга эрэ баар. Билигин бу үгүөрү үп ханна тиийбитин быһаарсаллар.
“Лесная слобода” диэн архитектурнай-этнографическай комплекс, 50 гектардаах национальнай паарка тутуллуохтааҕа. Маны барытын ыраас хонууга тутуохтаахтара да, билигин кураанаҕынан көрөн турар. Били, тойотторбут үрдүкү түрүбүүнэттэн ыраламмыт “Хотугу мозаикалара” сыта да суох. Судаарыстыба көмөтүнэн коммункацията эҥин тардыллыбыта да, билигин ол таах тураахтыыр.
Чунуобунньуктар “Хотугу мозаикаҕа” “тымныы саарыстыбатын” тутуох буолан эрэннэрбиттэрэ. Ол гынан баран, билигин тутуу былыр үйэҕэ тоҥоруллан турар, оттон туристары “кэтэһэ түһүҥ” диэн уоскуталлар. Кластер тутулларын харах баайан 20 мөл. солк. аттракцион оҥорбуттар.
Кластер хаһан силигин ситэн үлэлиирин туһунан туризмы салайар чөмчөкөлөр тугу да эппэттэр. Ол гынан баран, докумуоҥҥа "2018 сылга үлэҕэ киириэ" диэн сурулла сылдьар ээ. Уопсайа 365 мөл. солк. көрүллүбүтэ. Ол харчыны инфраструктура бастакы олугун тутууга ыыппыттар. Кластерга суол тутуллубут, гаас тардыллыбыт, баһаарынай резервуардар тутуллубуттар, массыына турар сирэ, сырдатыы, ууну ыраастыыр ыстаансыйа оҥоһуллубут.
Бу улахан бырайыак хоту сир укулаатын, норуоттарын үгэстэрин көрдөрүөхтээх этэ. Ол гынан баран, хомойуох иһин, билиҥҥитэ олох атыны көрдөрөн турар. Билигин борокуратуура харчыны атын сыалга туһаммыттарын суоҕун бэрэбиэркэлиир. Борокуратуура бэрэбиэркэлиир, оттон тойоттор эрэннэриллибит болдьоххо кластеры үлэлэтээри инвестордары көрдүүллэр. Онуоха сир учаастагын, кирэдьиити биэрэргэ бэлэмнэрин этэллэр. Саха сирин үбүн министиэристибэтэ 1 млрд. солк. аукциону биллэрбит.
“Хотугу мозаика” силигин ситиэ дуо?
