Бастыҥнар ааттаннылар

Атырдьах ыйын 25 күнүгэр «Ааҕар Саха сирэ» кинигэ бэстибээлин сабыллыытыгар «Бичик» кинигэ кыһатын генеральнай дириэктэрэ Август Егоров анал наҕараадалары туттартаата.

Ол курдук, «Национальнай кинигэ кыһатын сайдыытыгар дьоһун кылаатын иһин» наҕарааданан экэниэмикэ билимин дуоктара, бэрэпиэссэр Василий Дарбасов, доцент, Арассыыйа худуоһунньуктарын Сойууһун чилиэнэ, Саха сирин норуодунай суруйааччыта Николай Лугинов историческай айымньыларын киэргэтээччи-худуоһунньук Дьулустан Бойтунов, Арассыыйа үөрэхтээһинин бочуоттаах үлэһитэ, Саха сирин үөрэҕириитин туйгуна, Арассыыйа күрэхтэригэр дьүүллүүр сүбэ биһирэбилин ылбыт учуобунньуктар ааптардара Лариса Захарова наҕараадаланнылар.

Маны таһынан, бу күн өрөспүүбүлүкэҕэ иккиc төгүлүн ыытыллар «Ааҕар Саха сирэ» кинигэ бэстибээлин иһинэн Национальнай кинигэ кыһата уонна СӨ Бырабыыталыстыбатын уонна Ил Дархан дьаһалтатын тыл боппуруостарыгар Управлениета ыытар кинигэ күрэҕин түмүгэ таҕыста.

Күрэххэ «Оҕо таһаарыыта» хайысхаҕа «Бастыҥ ааптар» аатынан поэт Иван Мигалкин «Алыптаах дойдуга» кинигэтэ наҕараадаланна. «Проза» хайысхатыгар кыайыылааҕынан Владислав Авдеев «Бобуулаах таптал» кинигэтэ ааттанна. «Поэзия» хайысхаҕа бастыҥ кинигэнэн норуодунай поэт Наталья Харлампьева «Мин аалым – балаҕаным» айымньыта буолла. «Үөрэх таһаарыыта» хайысха кыайыылааҕынан Михаил Аввакумов «Сурук-бичик» кинигэтэ биһирэннэ. «Бастыҥ дебют» номинацияҕа Виталий Егоров «Адыаччы алдьархайа» кинигэтэ тигистэ. «Научнай-популярнай» номинация кыайыылааҕынан Валентина Бочонина «Туймаада алгыстаах хочотугар Ыһыах» кинигэтэ таҕыста. «Аҕыйах ахсааннаах хотугу норуоттар литературалара» номинация кыайыылааҕынан Андрей Кривошапкин «Тормита буюсэмҥэ» («Булчут Тормита») кинигэтэ буолла. «Норуот үгэстэрин үйэтитии» номинацияҕа бастыҥынан Людмила Жиркова «Оҕуруолаах оҥоһуктар» кинигэтэ буолла. «Бичик» НКК «Бастыҥ хаартыскаҕа түһэрээччи» аатын Мария Васильеваҕа туттарда. Оҕо таһаарыытыгар «Бастыҥ худуоһунньук» - Маргарита Яковлева, оттон «Бастыҥ уруһуйдаах айымньы» номинация кыайыылааҕынан Александр Баишев ааттаннылар. «XXI үйэ кинигэтэ» күрэххэ «Бастыҥ электроннай таһаарыыны оҥорооччу» номинацияҕа Иннокентий Антонов, «Бастыҥ электроннай таһаарыы салайааччыта» Марина Макеева кыайыылаахтарынан ааттаннылар.

Өрөспүүбүлүкэ култуурунай олоҕор биир улахан суолталаах марафону түмүктүүр күнүгэр «Бичик» НКК салайааччыта Август Егоров тэрээһин туһунан бу курдук санаатын үллэһиннэ:

• Бу күннэргэ барыта 70 араас аахсыйа уонна презентация ыытылынна. Тэрээһиҥҥэ Дьокуускай куораттан уонна улуустартан 24 тэрилтэ кэлэн кыттыыны ылла. Кинигэ бэстибээлигэр барыта 7 тыһыынчаттан тахса куорат олохтооҕо уонна ыалдьыта сылдьыбыта киһини үөрдэр. Олортон 5,5 тыһыынча киһи кинигэ бородууксуйатынан хааччылынна.

Бу тэрээһин дьон-сэргэ өссө да ааҕарын таптыыр диэн дакаастаата. «Бичик» кинигэ кыһата икки сыл буолан баран, бэстибээли иккис төгүлүн бэйэтэ үбүлээн ыытарын бэлиэтээн эттэ. Кини инникитин СӨ Бырабыыталыстыбата, култуура министиэристибэтэ уонна да атын министиэристибэлэр, биэдэмистибэлэр дьон олоҕор суолталаах тэрээһини өйүүллэрэ буоллар диэн санаатын эттэ.

Август Егоров ааҕааччыларга көхтөөх кыттыыларын иһин махтанан туран, «Ааҕар Саха сирэ» бэстибээл үтүө үгэскэ кубулуйуо диэн эрэннэрдэ.