Балаҕан ыйын 11-13 күннэригэр Илиҥҥи экэниэмикэ форума 4-с төгүлүн Владивостокка буолар. Тэрээһин далааһына сылын аайы кэҥээтэр кэҥээн иһэр. Арассыыйа эрэ биисэнэс элиитэтэ буолбакка, бүтүн Аан дойду таһымнаах форум буолар. Саха Өрөспүүбүлүкэтин сайдыытыгар бу биир улахан суолтаах тэрээһин буолар.
Ил Дархан Айсен Николаев Камчатка кыраайын күбүрүнээтэрин Владимир Илюхины кытта дуогабар түһэристилэр. Санатан эттэххэ, бу сөбүлэһии өссө 2015 сыллаахтан үлэлиир.
Саха сирэ Камчатка кыраайын кытта инвестиция, култуура уонна туризм эйгэтигэр уопуттарын атастаһыахтара. 2018-2022 сс. научнай-техническай, социальнай-култуурунай, экономическай сибээстэри бөҕөргөтөн, бииргэ үлэлэһэргэ киэҥ далааһыннаах кэпсэтии тахсыаҕа. Онно эбии Камчатка балыгынан уонна муора бородууктатынан Саха сирин хааччыйар буолуоҕа.
«Дуогабар өссө биир кэрдииһинэн, балык хаһаайыстыбатын уонна таба иитиитин эйгэтигэр холбоһук бырайыактары олоххо киллэрии буолар», - диэн Камчатка кыраайын күбүрүнээтэрэ Владимир Илюхин бэлиэтээн эттэ.
«Бүтүн Арассыыйаҕа эрэ буолбакка, бүтүн аан дойдуга сураҕырар кэрэ айылҕалаах Камчатка тумул арыытыгар Саха сирин олохтоохторо сөбүлээн айанныыллар», - диэн Айсен Николаев хардарда.
Кини Камчатка олохтоохторун Саха сирин кэрэхсэбиллээх сирдэригэр – Өлүөнэ очуостарыгар, ирбэт тоҥ саарыстыбатыгар уонна сэлии түмэлигэр ыҥырда.
