Уус Майда Югоренок бөһүөлэгэр хочуолунай умайан, 240 киһи ититиитэ суох хаалла. Манан сибээстээн, тоҥон эрэр бөһүөлэккэ ЧС режимэ биллэрилиннэ. Хочуолунай баахта бөһүөлэгин 7 элбэх кыбартыыралаах дьиэтин, дьаһалтаны, почтаны уонна маҕаһыыны сылытара. Югоренокка саахалы туоратыыга Дьокуускайтан “Теплоэнергосервис” үлэһиттэрэ бардылар. Бөһүөлэк баһылыга Жанна Пиманова ЧС биллэриллибитинэн сибээстээн анал бөлөх тэриллибитин эттэ. Миэстэтигэр Югореноктан уонна Солнечнайтан саахалы туоратыыга 15 киһилээх биригээдэ үлэлиир.
Хочуол уонна носуос систиэмэтэ кээһэммэтэ. Ититии систиэмэтэ дөйө тоҥмотун наадатыгар эбийиэктэр систиэмэлэриттэн ууну бүтүннүү сүөкээтилэр. Үгүс дьиэҕэ маһынан оттуллар оһох уонна ититэр тэрил баар. Дьаһалта маныаха сөп буолар оттук мас саппаастаах. Югоренокка саахалы туоратыыга СӨ ДьУоХХтан уонна энергетика миниистирин бастакы солбуйааччы Николай Дуров айаннаабыттар.
