Саха Өрөспүүбүлүкэтин Судаарыстыбаннай Мунньаҕын (Ил Түмэн) алтыс ыҥырыытын бастакы пленарнай мунньаҕар норуот дьокутааттара “1945 с. балаҕан ыйын 3 күнүгэр сокуоннай саастарын туолбатах гражданнарга социальнай өйөбүл дьаһалларын туһунан” өрөспүүбүлүкэ сокуонун барылын иккис ааҕыыга көрдүлэр.
1945 сыл балаҕан ыйын 3 к. туругунан сокуоннай саастарын туола илик гражданнарга социальнай өйөбүл дьаһалларын туһунан сокуон ылылынна.
Парламеҥҥа “Биир ньыгыл Россия” фракциятын салайааччыта, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Владимир Чичигинаров сокуон барылын туһунан сиһилии иһитиннэриини оҥордо.
Владимир Ильич бэлиэтээбитинэн, сокуон барылынан 1945 сыл балаҕан ыйын 3 к. сокуоннай саастарын туолбатах гражданнар (Аҕа дойду Улуу сэриитин оҕолоро) быраапка статустарын итиэннэ ыйыллыбыт дьоҥҥо социальнай өйөбүл дьаһалларын быһаарыы көрүллэр. Саха Өрөспүүбүлүкэтин сокуонун барылынан Аҕа дойду Улуу сэриитин оҕолоругар социальнай өйөбүл маннык дьаһалларын биэрэр туһунан этиллэр (Саха Өрөспүүбүлүкэтин сокуонун барылын 2-с ыстатыйата):
— ый аайы 1000 солк. кээмэйинэн харчынан төлөбүр. Ыйдааҕы харчынан төлөбүр кээмэйэ Саха Өрөспүүбүлүкэтин Бырабыыталыстыбата быһаарбыт бэрээдэгинэн уонна болдьохторунан индексацияланар;
— сыл аайы доруобуйаларын туругун диспансеризациялааһын;
— Саха Өрөспүүбүлүкэтин сиригэр-уотугар санаторийга-куруорка эмтэниигэ путевка сыанатын 50 бырыһыанын кээмэйинэн харчынан толуйуу эбэтэр Саха Өрөспүүбүлүкэтин сиригэр-уотугар санаторийга-куруорка эмтэниигэ путевка сыанатын 50 бырыһыанын төлөөһүн — кинилэр бэйэлэрэ талалларынан 3 сылга биирдэ бэриллэр;
— стационар, стационар аҥаардаах социальнай өҥөлөрү оҥорор социальнай хааччыйыы тэрилтэтигэр уочарата суох киллэрии, дьиэҕэ-уокка социальнай хааччыйыы хайысхатынан өҥөлөрү оҥорор социальнай тэрилтэлэринэн уочарата суох хааччыллыы.
Салгыы Владимир Чичигинаров социальнай өйөбүл дьаһалларыгар ороскуоттар Саха Өрөспүүбүлүкэтин судаарыстыбаннай бюджетын суотугар үбүлэнэллэрин иһитиннэрдэ. Үөһэ этиллэр ыстатыйа 1-кы чааһынан олохтоммут социальнай өйөбүл дьаһалларын биэрии бэрээдэгин Саха Өрөспүүбүлүкэтин Бырабыыталыстыбата бигэргэтэр. Ити Сокуон 1-кы ыстатыйатыгар ыйыллыбыт Аҕа дойду Улуу сэриитин оҕолоругар биир көрүҥнээх дастабырыанньалар бэриллэллэр.
Дастабырыанньалары оҥоруу, биэрии уонна учуоттааһын бэрээдэгин СӨ Бырабыыталыстыбата быһаарар.
Гражданин маны тэҥэ федеральнай сокуонунан, Россия Федерациятын атын нуорма-быраап аакталарынан, Саха Өрөспүүбүлүкэтин бу сокуонунан, атын сокуонунан эбэтэр нуорма-быраап аактатынан олохтоммут социальнай өйөбүл ылар бырааптаах буоллаҕына, киниэхэ ити сокуоннарынан, быраап аакталарынан олохтоммут социальнай өйөбүл бэриллэр (гражданин талыытынан).
Сокуону дьүүллэһиигэ парламент бэрэссэдээтэлин солбуйааччы Виктор Губарев сокуон барылын иккис уонна бүтэһиктээх ааҕыыга ылынарга этии киллэрдэ. Норуот депутата Мария Христофорова сокуон суолтатыгар болҕомтону уурда, оттон Юрий Григорьев биир көрүҥнээх дастабырыанньа туһунан чопчуласта.
Норуот дьокутааттара сокуон барылын бүтэһиктээх ааҕыыга ылынарга быһаардылар.
Бу сокуон 2019 сыл тохсунньу 1 күнүттэн үлэлиэҕэ. Саха сиригэр 2646 киһи маннык өйөбүлүнэн туһаныаҕа.
Сардаана Кузьмина
