Булуҥ улууһун Быковскай нэһилиэгин олохтоохторо сотору кэминэн күн аайы оһох оттортон босхолонуохтара. Күн-бүгүн нэһилиэккэ 68 олорор дьиэ баарыттан 25-һэ киин ититиигэ холбонно.
Быковскай баһылыга Сергей Попов СӨ Дьиэ-уот хомунаалынай хаһаайыстыбатын уонна энергетикаҕа миниистирэ Дмитрий Садовниковтыын хаалбыт дьиэлэри киин ититиигэ салгыы холботор туһунан кэпсэттилэр.
“Быков Мыс курдук ото-маһа суох, саһаанныырга күчүмэҕэйдэрдээх сиргэ хайаан да киинтэн ититии баар буолуохтаах”, — диэтэ министир.
Быковскай сэлиэнньэтигэр киин хочуолунай 2012 сыллаахха тутуллан киирбит, ньиэп уматыгынан үлэлиир. 2014 ысллаахха 391 м усталаах ититэр ситим тардыллан 23 дьиэ аттыгар тиийбит. Баһылык Сергей Попов этэринэн, бу дьиэлэр сөптөөх докумуоннара суох буолан ититиигэ кыайан холбоммокко тураллар. Билигин нэһилиэк дьаһалтата докумуоннары оҥорууга үлэлэһэр. Билигин 20 дьиэ холбоноро хаалбыт (балар холбоноллорун туһунан боппуруос өссө да тура илик эбит), ол иһигэр ититии ситимиттэн тэйиччи турар 6 дьиэ. Маны таһынан, нэһилиэккэ элбэх дьиэ туруга мөлтөөн, курдат үрэ турар буолбут. Инньэ гынан, тэхэньиичэскэй боппуруостар үөскээннэр, үгүс дьиэ киин ититиигэ холбоноро салгыҥҥа ыйаммыт.
Тойон Садовников хаалбыт 23 дьиэни Быковскай киин хочуолунайыгар холбуурга инвестиция бырагырааматыгар киллэрэр туһунан эттэ, оттон хаалбыт дьиэлэри автономнай ититиини холботорго боппуруоһу үөрэтиэххэ наада диэтэ.
