Суруйааччы уонна тылбаасчыт, оҕоҕо аналлаах элбэх кинигэ ааптара Раиса Винокурова, “Күлүмчээн” диэн хоһоонунан оҕо энциклопедиятын сүрэхтээтэ.
Мэҥэ-Хаҥалас улууһуттан төрүттээх Раиса Винокурова Хаар Мичээрэ диэн аатынан суруйар. Кини бастакы хормуоска-кинигэ ааптара, ыччакка аналлаах мюзикллар сценариһа, “Ромео и Джульетта”, “К Чаадаеву», «Оды спорту» хоһооннор тылбаастарын ааптара, бэйэтин үгүс хоһоонноро ырыа буолбуттара.
“Хоһоонунан энциклопедияны таһаарыы сонун буолбатах. Маннык нууччалыы тылынан тахсыбыт энциклопедиялар элбэхтэр. “Күлүмчээн” кыра оҕолорго уонна оскуола оҕолоругар аналлаах. Түгэнинэн туһанан, матырыйаал хомуйуутугар көмөлөспүт дьоҥҥо улахан махталбын тиэрдэбин”, – диэн Раиса Винокурова кэпсээтэ.
Энциклопедияҕа хаартыскаҕа түһэрээччи Мария Васильева үлэлэрэ киирдилэр.
Раиса Винокурова – суруйааччы, тылбаасчыт, сценарист, Арассыыйа суруналыыстарын Сойууһун чилиэнэ, идэтинэн биолог. Оҕоҕо аналлаах кинигэлэрин таһынан «Домашняя аптечка из якутских трав» кинигэ ааптара. Бэйэтин бородууксуйатын “Якутия Экспо” быыстапкаҕа көрдөрбүтэ.
