Үүнэр сылга өрөспүүбүлүкэ иһинэн көтөр аалынан субсидиялаах эриэйсэлэр сырыылара быһаарылынна. Бу туһунан СӨ Тыраанспар уонна суол хаһаайыстыбатын министиэристибэтин пресс-сулууспата иһитиннэрэр.
«Полярные авиалинии» уонна «Алроса» авиа хампаанньалар Ми-8Т, Ми-8МТА бөртөлүөттэрэ, Pilatus-6, Ан-3 уонна Ан-2 сөмөлүөттэрэ көтүөхтэрэ.
“Былырыыҥҥы курдук субсидиялаах эриэйсэлэр ордук хоту сытар улуустарга уонна оройуоннарга оҥоһуллуохтара. Ол курдук, Абыйга, Аллайыахаҕа, Булуҥҥа, Дьааҥыга, Үөһээ Халымаҕа, Муомаҕа, Аллараа Халымаҕа, Өймөкөөҥҥө, Орто Халымаҕа, Усуйаанаҕа, Жиганскайга, Эбээн-Бытантайга, Өлүөхүмэҕэ уонна Анаабырга”, — диэн иһитиннэриигэ этиллэр. Ону таһынан, Уус-Майа, Уус-Алдан, Ньурба, Ленскэй, Кэбээйи, Бүлүү, Үөһээ Бүлүү уонна Алдан оройуоннарыгар оҥоһуллуо.
