Хотугу-Илиҥҥи федеральнай университет классическай үрдүк үөрэх кыһалар ортолоругар 28-с, оттон федеральнайдар ортолоругар 5-с миэстэ буолла. Бу туһунан ХИФУ пресс-сулууспата иһитиннэрэр.
Дойду бастыҥ үрдүк үөрэх кыһаларын рейтиҥин “Социальный навигатор” бырайыак иһинэн “Россия сегодня” норуоттар икки ардыларынааҕы иһитиннэрэр агентство оҥорор.
Быйыл рейтиҥҥэ дойду 81 субъегыттан 444 үрдүк үөрэх кыһалара кытыннылар. Судаарыстыбаннай, муниципальнай уонна чааһынай үөрэх кыһалара киирдилэр. Сыаналааһын үс киритиэрийинэн ыытылынна: үлэҕэ анаммыт устудьуоннар ахсааннара; өйү-санааны сайыннарар бородуукталары батарыыттан киирэр үп кээмэйэ; үлэһиттэр үлэлэрин цитататын i-индексэ. ХИФУ бу үс киритиэрийгэ көрдөрүүлэрин тупсарбыт.
Ордук үрдүк сыанабылы үөрэҕи бүтэрээччилэри үлэнэн хааччыйыы үлэтэ ылан, федеральнай үөрэх кыһаларын ортотугар бастакы күөҥҥэ таҕыста.
“Бу үлэ биэрээччилэри кытта ыкса үлэлээһин түмүгэ буолар. Сыл аайы 85-90 % киһи үлэҕэ киирэр. Олортон идэлэринэн – 98 %. Ону таһынан, үөрэх бырагыраамматын тутула уларыйа турар. Ол курдук, магистратура уонна эбии үөрэхтээһин бырагырааммата кэҥиир Үөрэх-билим кииннэрэ, үөрэх уонна чинчийэр лабораториялар арыллаллар”, – диэн ХИФУ проректора Василий Саввинов иһитиннэрдэ.
Классическай университеттар бөлөхтөрүгэр 87 кыһа кытынна. Бастыҥынан Москубатааҕы судаарыстыбаннай университет ааттанна.
