Ахсынньы 26 күнүгэр куорат баһылыга Сардаана Авксентьева суруналыыстары уонна сүрүн эрэдээктэрдэри кытта көрүстэ.
Кини кэпсэтиини үөрүүлээх сонунунан саҕалаата. “Бу күннэргэ РФ Бырабыыталыстыбатыттан үтүө сонун кэллэ. Ол курдук, оскуолалары уонна уһуйааннары саҥа дьиэнэн хааччыйыыга үбүлээһин көрүллэр буолла. Оччоҕо оскуолаларга эбии 890 миэстэ оттон уһуйааннарга 400 миэстэ тахсыаҕа”, – диэн иһитиннэрдэ.
Ону таһынан, кыра уонна орто бизнеһи өйөөһүҥҥэ, уокуруктааҕы администрацияны кытта биэдэмистибэлэр докумуоннарын сөпсөһүүгэ электроннай көрүҥҥэ көһүү сөбүлэҥин, “Якутскэнерго” уонна “Сахатранснефтегаз” тэрилтэлэри кытта баттаһыахпыт диэн иһитиннэрдэ. Бу урбаанньыттарга ирдэнэр докумуоннарын биэрии болдьоҕун биллэ аччатыа диэн сабаҕалыырын эттэ.
Бобуулаах бизнеһи уонна суобаһа суох “урбаанньыттары” кытта күүстээх үлэ ыытыллыа. Кинилэр туһааннаах докумуоннара суох саарбах хаачыстыбалаах малы-салы атыылыылларын таһынан нолуок төлөөбөттөр. Мэр “лже-кафелары” холобурдаата. Ону таһынан, куорат олохтоохторуттан уопсастыбаннай тыраанспардар үлэлэригэр үгүс үҥсүү киирэрин эттэ. “Дьон ордук оптуобустар тымныыларын, муосталара халтараанын уонна сырыы графигын тутуспаттарын этэллэр. Онон бэрэбиэркэлэр ыытыллыахтара”, – диэтэ. Уонна кэлэр сылга уопсастыбаннай тыраанспары үлэлэтэр урбаанньыттарга лизинг быһыытынан 30 саҥа оптуобус ылылларын эттэ.
Үгэс быһыытынан 17-с кыбаартал туһунан боппуруостар киирдилэр. Сардаана Авксентьева этэринэн, кыбаарталга баар сорох дьиэлэр сокуон быһыытынан хаарбах туруктаах дьиэлэргэ киирбэттэр. Бу оройуоҥҥа 21 дьиэ көһөрүүгэ уочаракка турар.
“Якутия.Инфо” суруналыыһа Тимофей Ефремов айдааннаах Петросян тутуутун сирин туһунан ыйытта. “Бу дьыалаҕа экспертиза бара турар. Түмүгэ билиннэҕинэ хайаан да дьыаланы кытта билсиэм. Уокуруктааҕы администрация суукка сири үллэрии көрүҥнэрин туруорсар Дьокуускай куорат прокуратуратын ирдэбилин өйүүр”, – диэн мэр хоруйдаата.
Суруналыыстар куораттааҕы ханаал, саҥа оскуолалар тутуллууларын, суол бэлиэлэрин уо.д.а. боппуруостары ыйыттылар. Түмүккэ Сардаана Авксентьева суруналыыстары кэлэн иһэр Саҥа дьылынан эҕэрдэлээтэ уонна ситиһиилэри баҕарда.
