Ытыктабыллаах Саха сирин олохтоохторо!
“Ситим” медиа-бөлөх уонна тус бэйэм ааппыттан эһигини Төрөөбүт тыл уонна сурук-бичик күнүнэн эҕэрдэлиибин!
Үгэс курдук, бу күнү сырдатааччы, сахалыы сурук-бичик реформатора, лингвист-учуонай, “Сахалыы сурук-бичик” сахалыы бастакы букубаар ааптара Семен Новгородов төрөөбүт күнүгэр бэлиэтиибит. 1917 с. бастакы букубаар тахсыаҕыттан Саха уобалаһыгар баар оскуолаларга төрөөбүт тылы үөрэтии саҕаламмыта.
Оччолорго Семен Андреевич Новгородов норуот нэһилиэстибэтин, култууратын уонна төрүт үгэһин харыстыырга, чөл тутан хааларга тыл сүрүн үстүрүмүөн буоларын номнуо толору өйдүүр этэ.
Билиҥҥи глобализация үйэтигэр тыыннаах тыл улахан да, кыра да омуктар баар буолар дьылҕаларын быһаарар, көлүөнэ утумун хааччыйар, омук бэйэтин билиниитигэр төһүү буолар.
Биһиги өрөспүүбүлүкэбитигэр Төрөөбүт тыл уонна сурук-бичик күнэ норуоттар сомоҕолоһууларын уонна түмсүүлэрин күнэ буолла. Төрөөбүт тыл көмөтүнэн дьоммут-сэргэбит талаана арыллар, билиибит-көрүүбүт хаҥыыр, сиэрбит-майгыбыт, өйбүт-санаабыт сайдар, Хотугу дойду үйэлээх үгэһэ салҕаланар.
Биһиги көлүөнэ нуучча, саха, эбээн, эбэҥки, долган, дьүкээгир, чукча тылын харыстыыр, ыччаппыт туһугар чөл тутан хаалар – ытык сорукпут. Ол туһугар улахан болҕомтобутун уурабыт. Онуоха быйыл Ил Дархан биллэрбит Сомоҕолоһуу сыла өссө биир төһүү күүс, тирэх буолуо диэн эрэнэбин.
Күндү доҕоттор!
Бүгүҥҥү үөрүүлээх күҥҥэ төрөөбүт тылгытын харыстыыргытыгар, култуура нэһилиэстибэтин чөл тутан хааларгытыгар, ситиһиини баҕарабын!
Ил Түмэн дьокутаата, “Ситим” медиа-бөлөх генеральнай дириэктэрэ Мария Христофорова
