15 томнаах “Саха тылын быһаарыылаах улахан тылдьытын” оҥоруу үлэтэ түмүктэннэ.
Бу туһунан Гуманитарнай чинчийии уонна Хотугу аҕыйах ахсааннаах омуктар кыһалҕаларын институтун саха тылын салаатын салайааччы, филологическай билим доктора Надежда Данилова иһитиннэрэр: “Бу күннэргэ Новосибирскай куоракка “Наука” издательствоҕа “Саха тылын быһаарыылаах улахан тылдьытын” түмүктүүр 15-с тома таҕыста. Биһиги биир экземпляры тутан олоробут. Сотору тираһа барыта кэлиэ”.
Тылдьыт 9,5 тыһ сирэйдээх, 769 бэчээтинэй лиистээх. 15 томҥа 80 тыһ саха тыла киирбит.
Надежда Данилова саха норуота тылын сүтэрбэтин уонна сайыннарарын туһугар тылдьыт улахан суолталааҕын бэлиэтиир. Кини СӨ Бырабыыталыстыбатыгар бырайыак суолтатын өйдөөн кэмигэр үбүлээбиттэригэр махталын тиэртэ.
Маннык тылдьыт сүдү суолталааҕын туһунан 1935 сыллаахха судаарыстыбаннай, уопсастыбаннай деятель, учуонай уонна суруйааччы Платон Алексеевич Ойуунускай этэн турар. Кини саҥа тэриллибит Тыл уонна култуура институтун сүрүн соруга – саха тылын тылдьытын оҥоруу диэн бэлиэтээбитэ. Бу туһунан Платон Алексеевич “Якутский язык и пути его развития” диэн улахан ыстатыйатыгар суруйбута.
