Усуйаана улууһун Депутатскай бөһүөлэгэр 18 сыл аннараа өттүгэр сабыллыбыт кыраайы үөрэтэр түмэл үлэтин саҕалыа. Олохтоохтор күүстэрин түмэн экспонаттары хомуйаллар.
Бастакы хардыыны ыччат оҥордо. Ол курдук, оройуоннааҕы киин библиотека дириэктэрэ Туйаара Семенова салайааччылаах субуотунньук тэрийдилэр уонна экспонаттары түмэл дьиэтигэр тастылар.
“Урукку түмэл 2001 сыллаахха сабыллыбыта. Ол кэмтэн ыла номнуо 18 сыл ааһа оҕуста. Депутатскай бөһүөлэгэ оройуон киинэ эрээри, кыраайы үөрэтэр түмэл суоҕа. Инньэ гынан, бу түмэли төрөөбүт дойдубут устуоруйатын үөрэтэр, тарҕатар сыаллаах арыйан эрэбит. Усуйаана улууһун бочуоттаах олохтооҕо, норуот маастара Анна Петровна Голикова бастакы экспонаты бэлэхтээтэ. Экспонаттар кырдьаҕастар олорор дьиэлэригэр хараллан турбуттара. Түгэнинэн туһанан, ону тиэйиигэ көмөлөспүт ыччакка улахан махталбын тиэрдэбин. Бу күннэргэ улуустааҕы тэрилтэлэр икки ардыларыгар наадалаах матырыйаалы хомуйууга “эстафета” биллэриэхпит. Ол бу сыл бүтүөр диэри ыытыллыа. Онон түмэл ахсынньыга биирдэ арыллара былааннанар. Сүрүннүүр сэбиэккэ библиотека үлэһиттэрэ киирдилэр. Дьаһалта дьиэ булан биэрдэ. Ону таһынан, манна оҕо библиотеката баар буолуоҕа. Ити курдук ыччаттан саҕалаан бэтэрээннэргэ тиийэ бары күүс-көмө буолаллара олус хайҕаллаах”, — диэн Туйаара Семенова кэпсээтэ.
ulusmedia
