СӨ быыһыыр сулууспа үлэһиттэрэ Уус Алдан улууһун кэккэ нэһилиэктэригэр ыксыллаах быһыыга-майгыга дьону, сири-уоту хайдах быыһыырга, өрүһүйэргэ сэрэтэр үөрэх ыыттылар.
Ол туһунан СӨ быыһыыр сулууспа начаалынньыгын бастакы солбуйааччы Василий Тарскай маннык кэпсиир: “Биһиги олохтоох нэһилиэнньэҕэ ыксаллаах быһыы-майгы тахсар кэмигэр хайдах, туох миэрэлэри ылар туһунан үөрэх ыыттыбыт. Хомойуох иһин, Уус Алдан улууһуттан ыҥырыы киирэр. Холобур, былырыын 17 ыҥырыы киирбитэ. Инньэ гынан, олохтоохторго тыаҕа, өрүскэ, үрэххэ сылдьан кутталлаах түгэҥҥэ түбэстэххэ хайдах миэрэлэри ылар туһунан быһаардыбыт”.
Быыһааччылар Суоттуга, Хоноҕорго, Чэриктэйгэ, Дыгдалга сылдьан нэһилиэнньэни кытта көрүстүлэр. Ону таһынан, улахан оскуолаларга оҕолорго үөрэх ыыттылар. Тэрээһиҥҥэ олохтоох ЕДДС үлэһиттэрэ эмиэ кыттыыны ыллылар. Нэһилиэктэр баһылыктара, управлениелар салайааччылара Василий Тарскай лекциятын иһиттилэр. Василий элбэх интэриэһинэй ыйытыктарга хоруйдаата, сүбэ-ама биэрдэ. Ордук халаан уутун кэмигэр кутталлаах сиргэ хаайтаран хаалбыт дьону хайдар быыһыыр туһунан ыйыталастылар.
Онуоха Василий Тарскай маннык хоруйдаата: “Биһиги сыл аайы халаан уутугар бэлэмнэнэбит. Муус, хаар төһө халыҥа, температура улахан оруолу оонньуур. Чопчу бу диэн этэ уустук. Ол иһин, сыл аайы нэһилиэнньэҕэ сэрэтэр үөрэх ыытабыт”.
Үөрүйэх быыһааччылар суол саахалыгар түбэспит массыынаттан дьону быыһыырга маастар-кылаас көрдөрдүлэр. Ону таһынан, быыһыыр тиэхиньикэни уонна тэриллэри көрдөрдүлэр.
