Сунтаар улууһугар былырыын Тыа үлэһит киһитин сыла биллэриллэн, балай да хамсааһын тахсыбыт. Ыанньыксыт, сылгыһыт, мэхэньисээтэр, суоппар, сыбаарсык курдук олус наадалаах эрээри Сэбиэскэй кэм тохтуоҕуттан тоҕо эрэ ытыс үрдүгэр өрө тутуллубат, сыаналаммат тэҥэ буолбут идэҕэ төһүү болҕомто туһаайылларыгар бигэ тирэх ууруллубут.
Кырдьыга да, кинилэрэ суох туох улахан үлэтэ, ситиһиитэ кыаллыан сөбүй?! Анал куонкуруһу торумнаан, ол түмүгүнэн 25 идэҕэ кыайыылаахтары быһааран, хас биирдиилэригэр 50-нуу тыһ. солк. грант туттарбыттар. Бастыҥнар мэтириэттэрин Сунтаар килбэйэр киинигэр дьон көрдүн-биллин, үлэһит киһи сыаналанар, ытыктанар кэмэ кэллэ диэн, киэн тутта Бочуот дуоскатыгар сыһыарбыттар.
Тыа үлэһит киһитигэр – Албан аат, Чиэс уонна Бочуот буолуохтун!
