Муус устар 13 - ыам ыйын 31 күннэригэр ыытыллыбыт онкомаркерга чинчийиини 60 тыһ. тахса Саха сирин олохтооҕо ааспыт. Олортон 3 тыһ. тахса киһиэхэ нуорматтан тахсар онкомаркер баара биллибит. Бу туһунан СӨ Доруобуйа харыстабылын министиэристибэтин пресс-сулууспата иһитиннэрэр.
Искэн ыарыытыгар күтүрэммит ыарыһахтары салгыы олорор сирдэринэн сиһилии көрдөрүнэллэригэр анаатылар. Бу 3 тыһ. онкомаркерга үрдүк нуормалаах дьонтон 1700 киһитэ өрөспүүбүлүкэтээҕи онкология диспансерыгар босхо туттарбыт. Уопсайа диспансерга 13 тыһ. тахса киһи анаалыһы туттарбыт.
Санатар буоллахха, онкомаркер анаалыстарын киин куорат бары поликлиникаларыгар, оройуоннааҕы киин балыыһаларга уонна Дьокуускайдааҕы онкология диспансерыгар ылбыттара. Аахсыйаны Айсен Сергеевич бэйэтинэн көҕүлээбитэ.
