Дьокуускай куорат баһылыга Сардана Авксентьева элбэх оҕолоох ыаллар оҕолоро маршрутнай оптуобуһунан босхо сылдьалларын туруорсар.
1-11 кылааска үөрэнэр элбэх оҕолоох ыаллар оҕолоро куорат иһигэр маршрутнай оптуобуһунан босхо сылдьалларыгар, быһа холоон суоттааһын боппуруоһун куорат дьаһалтатын мунньаҕар дьүүллэһэллэр. Бу туһунан мэрия пресс-сулууспата иһитиннэрэр.
Дьокуускай куораттааҕы үөрэх салалтатын көрдөрүүтүнэн, киин куоракка 1-11 кылааска үөрэнэр оҕо ахсаана 44 тыһ тахса. Олортон маршрутнай оптуобуһунан босхо сылдьар 1-4 кылааска үөрэнэр оҕолор ахсаана 19 600. Манна куорат бүддьүөтүттэн сылга 148 мөл тахса солк үп көрүллүбүт. Үөрэх дьылыгар 360 сырыыга диэн суоттаныллыбыт. Бу туһунан экономика уонна үбүлээһин боппуруостарыгар баһылыгы солбуйааччы Михаил Воробьев иһитиннэрдэ.
1-11 кылаас үөрэнээччилэрэ оптуобуһунан босхо сылдьалларыгар сылга быһа холоон 333 мөл солк тэҥнэспит.
“Билигин бу сууманы куорат бүддьүөтэ уйунар кыаҕа суох. Онон, бастаан элбэх оҕолоох ыаллар орто уонна улахан кылааска үөрэнэр оҕолор оптуобуһунан босхо сылдьалларын ситиһиэххэ наада”, – диэн Сардана Авксентьева иһитиннэрдэ.
5-11 кылааска үөрэнэр элбэх оҕолоох ыаллар оҕолорун ахсаана 4,5 тыһ тэҥнэһэр. Кинилэр маршрутнай оптуобуһунан босхо сылдьалларыгар сылга эбии 34 мөл солк ирдэнэр.
Сардана Владимировна 2019-2020 үөрэх сылыгар оскуолаҕа ылыы түмүктэммитин кэннэ бүддьүөттэн төһө үп ирдэнэрин өссө төгүл ааҕарга сорудахтаата.
